Antonetta Schmidt, Sent, 1928 – 2013

Mi, 24. Apr. 2013

Als 10 avrigl 2013 es morta Antonetta Schmidt, pacas eivnas davo avair cumpli seis 85avel anniversari.

Per nus abitants da la Chasa Puntota es quai stat üna trista novità, siand ch’ella d’eira fin l’ultim bain in chamma e cha nus vain uschè inaspettadamaing stuvü tour cumgià dad ella. Antonetta d’eira per nus üna chara cumpagna e savaiva sco figlia da paur quintar bler dals temps passats.

A mai sta quista trista nouva specialmaing a cour, causa cha fingià ils genituors dad Antonetta, duonna Lina e sar Baltisar Schmidt, vaivan fich bunas relaziuns cun meis genituors. Eir scha las famiglias abitaivan üna a Sent e tschella a Ramosch hana adüna cultivà üna bun’amicizcha ed ün stret contact. Uschè n’haja cugnuschü ad Antonetta e seis fradgliuns fingià dad uffant e’l contact s’ha mantgnü fin pro sia mort.

A la chara trapassada giavüscha cha’l Segner detta ün quaid repos.

Jachen Riatsch, Chasa Puntota, Scuol

Kategorie: 

KOMMENDE EVENTS

STELLEN

IMMOBILIEN

DIVERSES