Artur Fontana, Susauna, 1939 – 2013

Mi, 10. Apr. 2013

D’incuort vains piglio cumgio dad Artur Fontana davaunt sia chesa paterna a Susauna. In quella d’eira’l naschieu als 6 lügl dal 1939 e da cò ho’l giavüscho da partir.

Artur Fontana ho passanto sia vita cun pitschnas interrupziuns scu servezzan militer e lavur tar la Viafier retica scu pur a Susauna ed a Chapella. L’infanzia in quista vschinaunchetta al pè dal Scaletta nun es adüna be steda bella. La scoula cul magister Hartmann chi da pü bod d’eira in lur stüvetta, nun haun ils iffaunts da Susauna pü pudieu giodair. Els vaivan da travacher la naiv crudeda la not per river a Cinuos-chel inua cha vaiva nom scu prüma d’as s-chuder e da metter s-charpas e stinvs a süjer vi da la pigna. La saira glistess viedi inavous. Ils Fontanas vaivan pers bod lur mamma e Clementina, la sour pü veglia, vaiva fingià düraunt la malatia stuvieu turner e surpiglier la rolla da chesarina. Da quel temp lavuraivan adüna darcho giuvnas da l’Engiadina Bassa aint il Scaletta a S-chanf, il lö, inua ch’eir Artur ho chatto sia duonna. Zieva las nozzas ho vivieu il giuven pêr ün pêr ans insembel cul bap Benedict e cun la sour a Susauna. Artur cumbinaiva la lavur tar la Viafier retica cul fer da paur. A sun naschieus tschinch iffaunts, quatter mattas ed ün mat.

Dal 1962 ho que do la granda müdeda, pels Fontanas ho cumanzo la vita da nomads. Per pudair trer sainza privel süls eroplans, vaiva il militer serro la fracziun da Susauna düraunt l’inviern e vaiva mis a dispusiziun chesas, melamaing isoledas, our a Chapella. Il muond dad Artur es adüna resto la val Susauna. Important al d’eira sia famiglia, la paschiun per las chevras, ch’el titulaiva scu «mias damas», la bescha ed ün pêr muagls, düraunt ans ho el eir tgnieu il buoch. Noss iffaunts d’eiran be nars dad ir a tramegl cun barb’Artur vi’n stalla. Lo quintaiva’l da las qualiteds da sias chevras e’ls mussaiva a der lat als usöls. E la prümavaira as pudaiva acumpagner ad Artur cur ch’el mnaiva las chevras sül paradis da Guantschera. Que chi capitaiva dadour i’l vast muond nu’l interessaiva bger, sieu reginam vaiva cunfins tal Piz d’Esan e tal pass dal Scaletta, ma quel al staiva a cour e quel defendaiva’l; e guai, scha qualchün as masdaiva in sieus affers, lura gniva’l a cugnuoscher eir la testa düra. Ün pitschen muond per quel chi craja dad avair maglio la sabgentscha cul sdun e da stuvair scuvrir ils ultims guinchels da nossa terra, ün grand per quel chi’s metta a cultiver cun premura e paschiun que chi al es surdo. Cun sia famiglia, sias bes-chas e sia plaschair vi dals iffaunts vaiva Artur Fontana chatto sieu muond. Ils ögls glüschaints dad Ezio, l’abiedi il pü giuven, chi viva cun sieus genituors a Susauna, haun schligerieu ad el il pass da la vita a la mort.

Autur: Romedi Arquint, Chapella

Kategorie: 

KOMMENDE EVENTS

STELLEN

IMMOBILIEN

DIVERSES