Gian Paul Caratsch, S-chanf, 1940–2013

Fr, 14. Jun. 2013

Gian Paul Caratsch es nat als 21 october 1940 e creschieu sü a S-chanf insembel cun sieu frer pü giuven Alex.

Zieva la scoula secundara ho el visito düraunt ün 10evel an da scoula il Lyceum Alpinum a Zuoz. A seguit il fer da famagl agricul giò Scuol, per frequenter alura la scoula purila al Plantahof, cull’intensiun da dvanter pur. Zieva la recruta tal Train as ho manifesteda ün’allergia da fain, stram e pagl da chavagl, chi l’ho sfurzo da der sü quel mister. Per pudair glistess lavurer illa natüra, ho Gian Paul visito tuot ils cuors bsögnaivels ed es dvanto silvicultur.
L’an 1962 marida el ad Erna Duschletta da Zernez. La famiglia vain benedida cun dschimels ed ün figl. La famiglia es per Gian Paul il pü important e tuots giodan dad ir adüna darcho cun el a god e’s lascher muosser tuot ils misteris da la natüra intacta.
L’an 1964 es el gnieu impiego da la vschinauncha da S-chanf scu silvicultur auxilier suot la guida dal vegl silvicultur Nuot Tschander. Düraunt ils prossems duos ans as ho Gian Paul dedicho primariamaing a la cluppaziun dals gods vasts da S-chanf, per surpiglier l’an 1966 la carica da silvicultur dal revier forestel da S-chanf e da mneder da la resgia a Chapella da sieu antecessur.
Gian Paul Caratsch ho servieu a la vschinauncha da S-chanf düraunt 40 ans, dal 1964 fin al 2004. In quel temp sun gnieus taglios 83 000 m3 laina. Da quel temp d’eiran ils richevs nets dal god e da la resgia las entredgias principelas da la vschinauncha da S-chanf, chi haun pussibilto la realisaziun da divers progets d’infrastructura e da chüra da god: la media da la rendita dals ans 1966 – 1997 importa per la gestiun forestela 67 000 francs l’an e per la gestiun da la resgia 21 000 francs l’an. Sper il resultat finanziel positiv es da manzuner impustüt il stedi dals gods cultivos cun premura, amur per la biodiversited, la cuntredgia e resguardand la perdüraivlezza. A S-chanf as chatta gods ringiuvnieus, bain s-chelinos, vitels e stabils, chi accumplischan optimelmaing lur funcziun da protecziun, da producziun da laina, scu god pasculo u da recreaziun e chi faun grand plaschair al giast ed al indigen.
In quatter decennis ho que do bgers müdamaints. Ils indschegners e chefs davart l’uffizi forestel chantunel d’eiran Otto Kaiser fin l’an 1989 e da lò inavaunt Giachem Bott. Gian Paul ho servieu suot 7 presidents cumünels ed ho gieu da chefer cun 10 chefs da god. El ho scolo 11 giarsuns da bos-cher, dals quêls tschinch s’haun scolos inavaunt al silvicultur da revier.
Gian Paul ho frequento divers hobis e s’ho integro plainamaing illa vita sociela da S-chanf e da tuot l’Engiadin’ota. Sper l’ir in muntagna, ir cullas pels in gita, fer passlung, der uras da skis scu magister da skis patento, ir cul velo da cuorsa e la musica istrumentela, d’eiran ils chauns da lavina sia paschiun prediletta. El ho edücho quatter chauns da lavina, mno ils cuors da chauns da salvamaint da lavinas sül Bernina e dafatta salvo la vita a duos persunas in lavina.
Düraunt 20 ans es Gian Paul sto illa suprastanza da la societed da musica da S-chanf, allura es el eir sto president da la societed da cura e da la vschinauncha vschinela da S-chanf. Zieva la pensiun es el eir gnieu elet i’l cussagl cumünel da S-chanf. Tal böt dal Marathon as ho pudieu quinter minch’an cul agüd activ da Gian Paul. Eir la cumischiun da lavinas da Zuoz e da la secziun Bernina CAS haun profito da las grandas cugnuschentschas da Gian Paul reguard naiv, lavinas e salvamaint da lavinas.
Al suotscrit restaron bgeras bellas uras in allegra cumpagnia, cun chaunt, umur e quintand qualche burlas u vizs (per part vegls) in fich buna memüregia. Sper l’allegria d’eira il defunt però adüna pront da surpiglier caricas e respunsabilited illa vita da minchadi e professiunela. El stimaiva la buna collavuraziun cun respet vicendaivel, nossa cultura rumauntscha, la natüra e nossa bell’Engiadina.
Süls 1.1.2004 es gnieu tschernieu Francesco Pietrogiovanna scu silvicultur e successur da Gian Paul, chi ho mantgnieu be pü qualche lavurettas da survagliaunza, coordinaziun e da mantegnimaint da sendas fin tar sia pensiunamaint als 1.11.2005.
Als 3 gün 2013 avains stuvieu udir tuot inaspettedamaing la trista nouva dal accidaint mortel da Gian Paul sül laviner Bügls. Ün coleg forestel competent e pustüt ün cher e fidaivel amih e camarad muntagnard, cun bun umur e spiert es dischplaschaivelmaing partieu a megldra vita. In nom dal servezzan forestel da tuot il chantun Grischun condolains sinceramaing als relaschos. Ch’el posa in pêsch!    

Giachem Bott

Kategorie: 

KOMMENDE EVENTS

STELLEN

IMMOBILIEN

DIVERSES