Carmen Brüngger-Martis, Champfèr, 1926–2013

Mi, 25. Sep. 2013

Als 11 avuost ho üna Champfèrotta da nom e da pom piglio cumgiò scu la pü attempeda membra da nossa fracziun dobla chi’d es naschida cò, chi ho in tuotta simplicited dal bun temp vegl passanto üna bell’infanzia in ün’epoca, inua cha mincha abitant s’eira consciaint da viver in bun spiert da vaira cumünaunza engiadinaisa.
Mia conscolara Carmen ho, scu be pü pochs traunter da nus, vivieu i’l sen da tradiziun ed üsaunza locala chi la gnit implanteda i’l ravuogl da nossa veglia scoula cumplessiva da ses classas. Scu giuvna allegra, paschiuneda pel chaunt ho’la cussalvo il mantegnimaint dal colorit local da Champfèr illa chesa paterna «Ers Cha Suot» inua cha’d haun ans ed ans vivieu quatter generaziuns in listess temp suot il medem tet. Cò gniva cultivo la bilinguited: il rumauntsch scu lingua dal cour e’l tu-?das-ch scu lingua per pudair s’exprimer e comunicher i’l minchadi cun tuot noss conabitants chi sun hozindi scu dapertuot in Engiadin’Ota in magiuraunza germanofons. Carmen Brüngger ho i’l lung percuors da sia vita matgnieu sieu humor, l’esser alleger e vivas-ch, il savair rir e’l ster adüna da buna glüna in cumpagnia, cussalvand cun buna memoria il sen per trategn comunicativ, resva-gliand adüna darcho bellas algordaunzas dals temps passos. Melavita l’ultim an da sia vita sias forzas spiertelas s’haun diminuidas visibelmaing, ed ell es dvanteda dependenta da chüra e fliamaint ch’ella ho arvschieu cun tuotta premura giò Promulins. Il Cor mixt Champfèr e’ls vegls Champfèrots la tegnan in buna e degna memoria. 

Philipp Walther

Kategorie: 

KOMMENDE EVENTS

STELLEN

IMMOBILIEN

DIVERSES