Florian Pitsch Mögling, Tschierv, 1926 – 2013

Fr, 13. Sep. 2013

Naschü es Florian Pitsch a Tschierv ingio ch’el ha vivü tuot sia vita. Il temp d’infanzia ha passantà Florian insembel cun sia sour Anita e seis frar Tumasch bain perchürà ed educà in ün furtünà ambiant pauril.

Previs d’eira cha Florian davò gnü ourd’scoula dvainta paur. Uschè ha el frequentà la scoula da paurs al Plantahof a Landquart. Ils prüms ons ha il giuven paur sustgnü a seis bap Rudolf illa pauraria. Cur ch’el vaiva 20 ons es morta sia mamma, que es stat ün cuolp terribel per tuot la famiglia ed ils pissers per l’avegnir chalchaivan a tuots. Duos ons plü tard l’on1948 es Florian entrà in lai cun la giuvna duonna Hanna nada Mögling. Cun schlantsch han els cuntinuà a far da paurs insembel cul bap Rudolf. Ma il travasch pauril d’eira plütost pitschen per nudrir a duos famiglias. Vezond cha be la pauraria nu tendscha per exister, ha Florian insembel cun sia duonna decis da tscherchar amo ün’otra occupaziun. Que d’eiran ils ons be cuort davo la seguonda guerra mundiala. L’infrastructura in Val Mü-stair d’eira in ün stadi devastus. Il stradun tras tuot la Val, las chasas da scoula, ils provedimaints d’aua in tuot ils cumüns, l’allontanar l’aua suos-cha ed il s-chart, ed amo bler oter, quai d’eira da prevaira chi stuvaiva gnir investi e fabrichà bler in Val Müstair. Florian cun seis pensar profuond futuristic ha stübgià vi da la necessità da transportar la roba, ils materials per tuot quai chi gnarà realisà. Il temp da far ils transports cun chavals, müls, bouvs e vachas appartgnaiva plan planet ma dal sgür al passà. Il temp da la motorisaziun staiva davant porta. Uschè amo l’on ch’els as han maridats cumpretten ils giuvens conjugals ün jeep. Cun quel veicul ha Florian cumanzà a far transports per otra glieud e natüralmaing eir per sia pauraria. Plan planet il svilup e la dumonda per far transports gniva adüna plü gronda. Dal 1955 ha el cumprà il prüm camiun. L’affar es creschü d’ün crescher per finir vaiva el üna flotta da set camiuns. Ils transports sun dvantats eir internaziunals. Eir üna garascha per far reparaturas vi dals autos es gnüda fabrichada. Ma na be l’affar es creschü eir la famiglia. Hanna e Florian sun gnüts benedits cun ot uffants. Tuots sun gnüds gronds a Tschierv, e minchün ha pudü imprender ün manster obain ir a stübgiar. Eir il dun da far il marchadant til ha accumpagnà tuot sia vita. Il prüm il marchadant da muvel e bainbod fet el eir il marchadant da maschinas agriculas e bler oter plü.

Na be il svilup per seis affar ed ils pissers per üna famiglia furtünada chi po prosperir til d’eiran important. Eir seis cumün, il cumün da Tschierv e tuot la Val Müstair al staivan a cour. Cun grond ingaschamaint as ha el intermiss per l’economia ed ün svilup positiv in Val Müstair. Ses ons es el stat president da cumün, in seis temp in uffizi ha el procurà sper bler oter plü, chi vegna fabrichà üna chasa da scoula nouva. Sco güdisch da pasch ed eir sco avuà ha el güdà cun grond savair e sapienza a blera glieud chi vaiva dabsögn d’ün sustegn moral o finanzial. Sco president da la cumischiun da fabrica ha el pisserà per ün model da repartir il terrain da fabrica dal cumün chi ha svaglià grond interess in tuot il Chantun e po gnir taxà sco model da premiera in tuot la Svizra. Seis ingaschamaint sco ün dals pioniers pel svilup turistic d’inviern cun la realisaziun dals runals Minschuns es admirabel. Cun seis temperamaint e gronda persvasiun per tuot quai ch’el pigliet per mans nun ha el adüna be as fat bainvis. Ma Florian ha adüna be manià bain. El vaiva sco ch’ün disch il cour in man. Ün hom cumplaschaivel, ün hom chi ha laschà inavò fastizis marcants e serviziaivels chi restaran per adüna, nun es plü tanter da nus. Char Florian eu At n’ha adüna admirà e predschà. Reposa in pasch.

Autur: Oswald Toutsch

Kategorie: 

KOMMENDE EVENTS

STELLEN

IMMOBILIEN

DIVERSES