Cumgià dad Oscar Peer (1928-2013)

Fr, 27. Dez. 2013

Uossa es Oscar Peer rivà in quel lö, dal qual nun es amo tuornà ingün per relatar. El es mort in sia chasa a Cuoira la dumengia avant Nadal, als 22 december, ün mez on davo seis ottantatschinchavel anniversari.

Ils ultims ons vain nus bler discurrü davart dumondas litteraras ed eir dal misteri da quel grond ed ultim pass terrester. Ch’el nun haja ingüna temma da la mort, maniaiva Oscar Peer e schi – ch’el saja oramai pront pel ultim passagi; la via da sia vita saja statta lunga. Ch’el spera da pudair conclüder amo üna part da sia lavur parderta sün sia maisa.
Ün dals cudeschs cha Oscar Peer ha scrit e rescrit danouv es il roman «Hannes – Bericht aus der Haft.» In noss ultims inscunters ha l’autur barmör adüna darcheu exprimi seis grond giavüsch da chattar üna chasa editura, saja quai per la versiun rumantscha sco eir per quella tudais-cha da seis «Hannes», edi per la prüma jada dal 1976. Nus ans vaivan miss avant bundant ün on vi da nossa ultima collavuraziun per edir il raquint «Eva ed il sonch Antoni / Eva und Anton.» Sco per blers da seis texts litterars vaiva Oscar Peer eir per «Eva» e la fuorma amplifichada «Eva ed il sonch Antoni» fingià bel e pront la versiun tudais-cha, cur ch’eu n’ha proponü per seis ottantatschinchavel anniversari ün’ulteriura ediziun bilingua, il quart volüm cun üna da sias ouvras per la chasa editura zürigaisa Limmat.
Oscar Peer ha adüna scrit in sias duos linguas, in rumantsch e tudais-ch. Ün da seis prüms raquints es cumparü in tudais-ch dal 1954 illa renomnada revista mensila da cultura «Du.» Quist cuort raquint intitulà «Der Traum» descriva il sömmi dad ün giuven taglialaina chi insömgia sia aigna mort, la quala subaintra il di seguaint in fuorma dad ün accidaint da god. Il chavagl dal taglialaina ha il trist presentimaint aint il sömmi ed eir illa realtà dal raquint. I’ns vain quintà ün raquint d’üna gronda suldüm dal giuven autur da vainchases ons chi d’eira sün via per dvantar magister da frances e talian e linguist rumantsch. Id es quist ün raquint chi demuossa in möd impreschiunant ün dals motivs centrals fingià in üna prüma ouvra litterara: Il destin dal cumbattant solitari e la greiva crusch süllas spadlas da l’uman sulischem sulet.
 Oscar Peer tematisescha seis leitmotiv cun maestria in sia novella «Il retuorn / Akkord», dà ün purtret varià in seis raquint «La chasa veglia / Das alte Haus» e descriva seis eroe solitari in seis prüm roman «Hannes – Bericht aus der Haft.» L’autur ans dà purtrets, express cun seis agens pleds, da «sentimaints primordials ed experienzas da nos temp.»
A quist sentimaint primordial ha Oscar Peer dat üna fuorma perfetta in seis cudesch d’algordanzas «La rumur dal flüm / Das Raunen des Flusses» creond culs purtrets d’infanzia e giuventüm ün omagi poetic litterar per sia famiglia, pels genituors e bapsegners, sco eir per sia val e pel temp agità istoricamaing da la prüma mità dal vainchavel tschientiner. «La rumur dal flüm» es forsa l’ouvra litterara la plü emoziunala ed intima dal grond narratur ladin. Quist cudesch es – culs pleds da l’autur – «dit in fuorma chi’s vezza in til legiond.» Ed in quellas paginas ans para eir da dudir la vusch da l’autur. Il cling da la vusch ans restarà dastrusch illa grond’ouvra dad Oscar Peer. Per sia ierta artistica impreschiunanta til savaina grond grà.

Autura: Mevina Puorger Pestalozzi (Turich), fotografia: Yvonne Böhler/Limmatverlag

Artichel cumparü als 27 gün 2013 illa «Engadiner Post/Posta Ladina» a reguard la staziun da la Viafier retica Carolina, inua cha Oscar Peer ha passantà seis prüms tschinch ons da sia vita.

Artichel cumparü als 15 settember 2011 illa «Engadiner Post/Posta Ladina» sur da la reediziun dal cudesch «La rumur dal flüm» dad Oscar Peer.

Kategorie: 

KOMMENDE EVENTS

STELLEN

IMMOBILIEN

DIVERSES