In memoria dad Ugo Bivetti (1939–2013)

Fr, 17. Jan. 2014

Als 14 december da l’an passo ho üna fich granda raspeda funebra piglio cumgiò dad ün schlass Bregagliot chi’d ho vita düraunta vivieu a Fex-Curtins...

... scu figl dschimè da Pierino ed Emma Bivetti-Salis insembel cun sieus fradgliuns Ricardo, Erica, Frida, Pierino e Silvia, apunto nos Ugo. Il spiert da schlass pur muntagnard l’es fingià gnieu do in chüna. Creschieu in relaziun simpla ho il cher trapasso imprais già da giuven insü que cha significha la lavur pretensiusa in ravuogl familier puril, cultivand il fuonz cun premura particulera. Tuot las capaciteds dad Ugo sun gnidas caracterisedas ed evaluedas toccantamaing tres nos zuond stimo ravarenda Urs Zangger.
E che mister dess insè gnir esseguieu sch’ün es collio già davent da la prüm’infanzia cul sögl patern? Ad es cler ed evidaint: Ün Bargajot persvas ho adüna seguieu als stizis e pass dal puresser. E que es steda la prüma decisiun dad Ugo. Bain dotto da bgers duns pratics s’ho’l decis dad esser occupo düraunt tuot an. El es dvanto cuvratets e scu skiunz paschiuno interesso i’l sectur linguistic, s’ho’l decis da dvanter guida da muntogna e magister da skis. Sias cugnuschentschas specificas da noss contuorns muntagnards l’haun pussibilto d’inchanter ad üna bgerüra da cliantella naziunela ed internaziunela, fand innumbrablas gitas in muntagna da sted ed instruind d’inviern a bgers skiunzs e skiunzas sün noss vasts territoris da skis. Scu vair amih da la natüra s’ho’l ans ed ans dedicho a la chatsch’ota, respetand dapertuot ed in tuot las reglas e prescripziuns da protecziun. Lavur exacta e da precisiun ho Ugo prasto sün üna quantited da tets, cuverts per la magiur part cullas cuntschaintas plattas da Fex. Bain preparo cun existenza asgüreda s’ho’l decis da fer daspera tiers eir da pur, surpigliand la puraria da sieus genituors. Cun quist fat ho’l chatto in sia fidela consorta, Silvia naschida Kuhn ed impraisa fliunza, la vaira cumpagna da vita chi l’ho sustgnieu ed assistieu fin a sieu ultim respir. Ugo e Silvia haun gieu la furtüna d’edücher e d’amusser a duos bravas figlias, Martina ed Eva, chi amenduos haun fundo lur egnas famiglias insembel cun lur marids. Hoz cumplaundschan ils relaschos la perdita d’ün bun marid, bap, sör, non e frer chi’d es gnieu delibero da maligna e greiva malatia. Ün schlass pur muntagnard chi’d ho cultivo e vivieu üna vaira vita da pur bregagliot, dvanto stimo Engiadinais cun sia paschiun pel chaunt populer, nun es pü traunter da nus, ma nus al tgnains in buna e degna memoria.   

Autur: Philipp Walther

Kategorie: 

KOMMENDE EVENTS

STELLEN

IMMOBILIEN

DIVERSES