Punt da Magnacun sün buna via

| Sa, 18. Jan. 2014

Ils grüs stan salda ed il trafic circulescha darcheu normal. Surtuot la fabrica da la punt da Magnacun ha chaschunà dürant la stà blers disturbis, adonta cha las lavuors han gnü lö per gronda part suot il trassè da la via existenta.

Las circumstanzas meteorologicas han permis a las intrapraisas involvadas cullas lavuors da la punt da Magnacun da lavurar fin sur la mittà da december oura. In seguit han ils lavuraints rumi il plazzal e preparà la fabrica pella posa d’inviern. Intrachà cullas lavuors a favur da la sgürezza dal trafic sülla via chantunala H27 es eir Ruedi Waldburger da l’Uffizi chantunal da construcziun bassa. El tira ün riassunt positiv da la stagiun da fabrica 2013 adonta da divers obstaculs. «Pervi da difficultats geologicas inaspettadas vaina stuvü construir las duos vascas pels pilasters raduond ot meters plü chafuollas co previs», disch el. Quai ha per consequenza ün retard da circa duos mais sül program da fabrica. Quist discapit ha eir consequenzas süls cuosts. Ruedi Waldburger affirma il fat, relativescha però: «Quia as tratta da prestaziuns implü chi sun però inclusas ils desch pertschient reserva cha’l contrat d’ouvra prevezza.» Eir las boudas da l’ultima prümavaira han chaschunà a Magnacun fingià impedimaints e retards.
Las lavuors sülla via Engiadinaisa H27 han chaschunà dürant la stagiun 2013 numerus impedimaints. Sur mais han fin tschinch amplas interruot il flüs dal trafic tanter Zernez e Scuol. Dasper plazzas da fabrica chi han puli, stabilisà e sgüra la grippa sur il trassè, ha surtuot la fabrica a Magnacun dat in ögl. Duos gronds grüs, ün da quels pozzà propi sülla via chantunala, e bler travasch han pretais pazienza ma eir resguard d’automobilists co eir dals lavuraints sülls plazzals da fabrica.

Il olazzal da fabrica da la punt da Magnacun suot la via chantunala. Illa spuonda as vezza ün dals duos vascs chi portan plü tard ils pilasters.

La punt vain fabrichada ingon
Sco cha Ruedi Waldburger ha dit, es planisada la fabrica dals pilasters e la punt stessa dürant l’on curraint. «Las lavuors da finischiun, la bordüra, la vetta da sigillaziun e la surfatscha definitiva da la punt gnaran fattas plüchöntsch pür dal 2015.» La punt da Magnacun es raduond 140 meters lunga e’s pozza sün duos pilasters chi vegnan construits analog la punt da Tarasp culs pilasters chi vegnan construits i’l vöd da grondas vascas. Grazcha a quista construcziun vegnan ils pilasters in quellas vascas schligerits dal squitsch dal terrain in movimaint.
Fin sül trassè es finida eir l’uschè nomnada Lehnenbrücke chi prosegua da la punt da Magnacun in direcziun da Giarsun. Quist on dess eir gnir prosegui cullas lavuors sur la punt ota in direcziun dad Ardez. Inavant bloccà resta la part Giarsun culla cruschada per Guarda. Quist traget sto gnir amo dat liber dal Chantun. Quai davo ch’ün recuors ha fermà l’andamaint dal proget.
Tenor Waldburger vain quist on eir prosegui cun lavuors da schlargiamaint da la via existenta sün permanentamaing 7,5 meters largezza. Ed eir cun lavuors da rimplir las costas da la via tanter Giarsun ed Ardez-Vest. «Surtuot la part tanter Giarsun e Magnacun es fich importanta, eir pel bilantsch dal material», disch el. La preparaziun e l’elavuraziun dal material da fabrica sto gnir dischlochada pervi da mancanza da plazza lung la via chantunala. Ella vain surdatta a’ls implants da gera illa regiun. «Quai es però chosa da las intrapraisas», conclüda Ruedi Waldburger.

La uschè nomnada «Lehnenbrücke» chi maina plü tard sülla nouva punt da Magnacun.

50 milliuns per daplü sgürezza
Raduond 50 milliuns francs cuostan las lavuors pella sgürezza dal trafic sülla via Engiadina H27 tanter Lavin ed Ardez ils prossems ons. Las sfidas, surtuot quellas geologicas sün quist sectur da be güsta 7,5 kilometers sun numerusas. Sur plüs kilometers es la cuntrada sur il trassè da la via chantunala cuntinuadamaing in movimaint (vair «Posta Ladina» dals 25 avrigl e dals 2 mai 2013).
Tenor Roger Staubli, schef dal repart fabricats da vias da l’Uffizi chantunal da construcziun bassa, po la construcziun da la punt da Magnacun dürar almain amo duos ons fin tar l’inauguraziun. Il proget final per fabrichar oura la via H27 tanter Lavin ed Ardez pudess perfin ir a fin pür dal 2020. Il proget es stat preschantà detagliadamaing illa «Posta Ladina» dals 2 mai 2013.

Autur e fotografias: Jon Duschletta

Neuen Kommentar schreiben

CAPTCHA
Diese Frage soll automatisierten Spam verhindern und überprüft, ob Sie ein menschlicher Besucher sind

KOMMENDE EVENTS

STELLEN

IMMOBILIEN

DIVERSES