Theresa Cadonau-Pitsch 1938–2014

Di, 04. Mär. 2014

Üna ourdvart granda comitiva funebra ha tut cumgià in venderdi, als 15 favrer in baselgia refuormada a Samedan da duonna Theresa Cadonau-Pitsch, morta davo greiva malatia in l’età da 76 ans.

Nada es ella dal 1938 sco figlia la plü veglia dals quatter uffants da Carl ed Anna Pitsch-Baldauf sül bain giosom da Pütschai a Sta. Maria. Qua ha ella eir passantà sia infanzia e sia giuventüna. Quai nu d’eira quella jada be simpel. Ils temps da guerra e da crisa han relaschà lur stizis eir pro la famiglia Pitsch e sforzà da’s cuntantar cun pac. Impustüt il viadi da scoula da Pütschai fin a Sta. Maria, l’inviern a pè tras tuot las naivs, d’eira plü co stantus e faiva fastidi. Theresa nun ha però pers il curaschi ed absolt cun bun success eir la scoula secundara. Davo ün on giò la Bassa es ella tuornada causa l’increschantüna bain svelt darcheu inavo in patria. A Samedan ha inscuntrà Theresa a seis hom, Natal (Talin) Cadonau, sco cha tuots til clomaivan. El lavuraiva quella jada pro la Viafier retica. Dal 1961 s’han els maridats. Lur lai es gnüda benedida tras la naschentscha da lur figl Carl e da la figlia Ladina. Blers ons es statta la famiglia Cadonau-Pitsch da chasa a San Murezzan, ingio cha’ls uffants han eir passantà lur infanzia. Davo entrats in pensiun han els alura tut dmura in a l’En a Samedan. Talin vaiva chattà in prosma vicinanza üna pitschna ufficina da falegnam e’s dedichaiva qua a seis hobis. A Samedan s’ha Theresa vivüda aint fich bain e cugnuschaiva eir a blera glieud. Ella es statta lönch üna diligiainta commembra dal Cor mixt ed ha eir partecipà cun plaschair a las numerusas occurenzas pels seniors. Theresa d’eira üna paschiunada raquintadra cun bler umor chi savaiva divertir la cumpagnia sco pacs oters. I d’eira adüna ün plaschair da tilla inscuntrar sün via e da pudair barattar cun ella ün pêr pleds, suvent natüralmaing – co pudess quai esser oter – culla tematica Val Müstair. Bleras jadas ha’la quintà quant greiv chi saja stat per ella da’s distachar da lur bain da Pütschai chi’d es gnü vendü. Cun plaschair pigliaiva ella part a las reuniuns da classa in Val Müstair per pudair darcheu üna jada inscuntrar als conscolars d’üna jada e barattar veglias algordanzas.
Displaschaivelmaing es mort Talin relativamaing bod, ün greiv cuolp per Theresa, dal qual ella nu s’ha plü remissa inandret. Al principi da quist on ha’la gnü da’s render causa üna puoncha a l’ospidal ed als 7 favrer ha’la bandunà quist muond per adüna. Il Cor mixt ha tut cumgià da sia fidela commembra culla commoventa chanzun da Fredy Oswald «Infanzia». Ch’ella reposa in pasch.    

Autur: Jon Manatschal

Kategorie: 

KOMMENDE EVENTS

STELLEN

IMMOBILIEN

DIVERSES