Derungs e Joos expuonan sur cunfin

| Di, 12. Aug. 2014

Il cheu disch da tuornar e l’instinct voul seguir la senda chi vain travusa da la frus-chaglia. Be chi chi segua il truoi es propcha pront da far il viadi in ün muond mistic e perfet.

Üna tablina pro’l pitschen parkegi dadour Vinadi muossa la direcziun. Da seguir quista via, d’eira scrit i’l invid. Però davo pacs meters finischa la via in ün prà e be üna sendina muossa la direcziun vers l’En. Ed eir quista senda vain adüna plü stretta e plü stipa. Da tuottas duos varts da la senda crescha la frus-chaglia chi para da travuonder il vial. Bainsvelt as survain l’impreschiun d’esser sülla via sbagliada. Il cheu disch da tuornar, l’instinct però da seguir il schuschuri da l’En. Sco in üna paravla mistica as vezza tuot in d’üna tanter la bos-cha e frus-chaglia la müraglia d’üna fortezza tuot speciala vidvart l’En. Sco scha la spassegiada stantusa suot la plövgia vess manà in ün oter muond e sco scha’l tun da la sajetta vess fat ün sigl dal temp. Davant ils ögl üna gronda fortezza cun differents stabilimaints per part sül grip chi finischa chafuol i’l En. Üna pitschna punt cuvernada es l’unic passagi sur l’En in quist muond mistic. I’s survain la pel giallina a pensar a l’importanza istorica da quist lö a la fin dal muond. Da tuot las varts creschan paraids aint il tschel e la civilisaziun sparida ed inaccessibla.
Tantüna as vezza fatschas cuntschaintas chi han fat la listessa experienza e sun seguidas a l’invid per l’avertüra d’ün exposiziun ad Altfinstermünz.

Ün bös-ch, üna bes-cha, ün abiss
L’artist da Strada, Otmar Derungs, es vairamaing ün vegl tschiervi sün seis metier. Daspö quarant’ons pittura el cun culuors d’öli sün taglia: ün bös-ch, üna bes-cha ed ün abiss chi’s perda illa profuondità da la culur blaua. Daspö quatter decennis adüna ils medems motivs. Sias ouvras sun unicas e remarchablas. Derungs ha grond’experienza cun exposiziuns impustüt in Engiadina e minchatant eir a l’ester. Ma da pudair expuoner ad Altfinstermünz es eir per el alch tuottafat special. Sias ouvras sun sco fattas per quist lö istoric. Passa desch ons ha la Società Altfinstermünz investi e lavurà per renovar ils stabilimaints dad Altfinstermünz per render accessibel la fortezza d’aventüras al public. Bler es restà sco ils ultims tschientiners. Ingio chi faiva dabsögn esa gnü renovà cun gronda finezza e detagls remarchabels. Eir las ouvras dad Otmar Derungs han fat ün svilup ed ils bös-chs han survgnü fuormas plü specialas, las bes-chas sun dvantadas plü exoticas e la culur blaua ha fat plazza ad otras culuors marcantas. Qua o là crescha dafatta üna muntogna a la fin da la profuondità. Sias ouvras quintan l’istorgia artistica da l’artist indigen. E la fortezza d’Altfinstermünz es perdütta d’ün’istorgia fascinanta da tschientiners d’ün lö da passagi strategic tanter differents cunfins.

 

Üna collavuraziun sur cunfin
La simbiosa tanter ils stabilimaints istorics e las ouvras artisticas da l’artist Otmar Derungs vain suottastrichada cun sculpturas da bruonz e da marmel da l’artist Armin Joos dal Vnuost. Derungs e Joos s’han imprais a cugnuoscher avant trais ons in occasiun dal inscunter d’artists «grenzartig» a Danuder. La simpatia vicendaivla, artistica e persunala, es subit statta avantman. E culla culissa da la fortezza istorica sper l’En es statta perfetta la collavuraziun sur cufin. Armin Joos preschainta ad Altfinstermünz tanter oter sculpturas da marmel da la mitologia greca. Però impustüt sias ouvras da bruonz culladas fan la punt cull’istorgia dad Altfinstermünz e cun art e lavur manuala. Sias üsaglias da bruonz san esser art, pon però güst uschè bain eir gnir dovradas per lavurar. Uschè vain il visitaduor da l’exposiziun minchatant confruntà culla dumonda: D’eira quist’üsaglia fingià adüna quia, o es quai ün’ouvra d’art da l’exposiziun?
Quist’irritaziun artistica svaglia l’interess ed arrundischa l’atmosfera fascinanta da l’exposiziun. Cun observar l’exposiziun i’ls differents stabilimaints e locals istorics dad Altfinstermünz para il temp da star salda. Ed il sentimaint paschaivel e da plaina cuntantezza lascha invlidar tuot ils pissers actuals. Pür pro’l parkegi dadour Vinadi as sdaisda our dal sömmi e’s tuorna inavo i’l minchadi. Quist mumaint perfet passainta be chi chi segua l’instinct e nu’s lascha surmanar dal cheu, da volver e tuornar avant co siglir ill’aventüra mistica.

L’exposiziun dad Otmar Derungs ed Armin Joos ad Altfinstermünz es averta fin als 15 october dürant las uras d’avertüra www.altfinstermuenz.at.

Text e video: Nicolo Bass, fotografia: Katharina Hohenstein

Neuen Kommentar schreiben

CAPTCHA
Diese Frage soll automatisierten Spam verhindern und überprüft, ob Sie ein menschlicher Besucher sind

KOMMENDE EVENTS

STELLEN

IMMOBILIEN

DIVERSES