Jörg Nikolaus Kindschi, 1954 - 2014

Mi, 27. Aug. 2014

Als 24 mai 2014 es disgrazià Jörg Kindschi cun 60 ons, sün üna muntogna ch’el cugnuschaiva sgüramaing uschè bain sco sia s-charsella.

Jörg Kindschi d’eira ün uman chi vaiva fich gugent las muntognas, chi s’occupaiva ferm culs privels cun ir in muntogna, culs privels chi’ns spetta giò da las muntognas ed in passond suotvia las muntognas.
Dasper seis büro d’indschegner e da geometer ha el prestà sün differents sectuors fich bler, ha fat fich buna lavur e vaiva ün grondius möd da tscherchar soluziuns ponderadas in qualsia cas. Uschea es el stat respunsabel in plüs cumüns per las meglioraziuns dal terrain agricul. Minchün chi ha gnü dachefar cun meglioraziuns, sà quant difficil chi’d es qualvoutas a chattar ils drets pleds per la discussiun, per far bunas propostas e per chattar ün bun rimbomb cun preschantar soluziuns a singulas persunas ed als cumüns, uschè cha tuot las parts sun cuntaintas. Jörg Kindschi vaiva per da quistas fatschendas ün excellent bun man.
Sco uman da las muntognas ha el fat part a la cumischiun da lavinas a Ftan, d’eira gnü elet dal chantun Grischun sco respunsabel per decider a reguard tgnair avert o serrar ün o tschel sectur da la via chantunala ed eir da vias cumünalas pervi dal privel da lavinas in nos district. Seis pled in chapitel d’eira a man da sia vasta experienza da fich gronda portada, uschè chi’s po sgüramaing dir ch’el ha adüna guardà per la megldra sgürezza da la generalità e da noss giasts.
Natüralmaing cha in connex cullas muntognas e la natüra d’eira seis ingaschamaint eir ferm involvà cul sport in general, però pustüt cul passlung e la promoziun dad atlets venturs.
Il listess bun man ha el eir gnü pro sia lavur sül sectur da la politica in Engiadina Bassa: El es stat dal 1994 fin dal 2001 cusglier cumünal a Ftan, dal 2013 s’ha el laschà eleger amo üna jada i’l cussagl cumünal, per güdar in qualsia maniera al cumün fin pro la fusiun dals cumüns, dal 1997 fin dal 2000 ha el fat part al güdisch circuital da Suot Tasna ed es gnü elet dal 2000 sco vicemastral. Dal 2006 es el alura gnü elet sco mastral dal circul da Suot Tasna ed ün per ons plü tard eir sco president dal parti politic PBD.
Jörg Kindschi es stat l’ultim mastral da nos circul chi ha amo gnü da trar decisiuns in chosas penalas, civilas, da pasch e sco intermediatur. El ha adüna chattà la storta ed üna buna via pro sias decisiuns.
Eir scha l’agenda da Jörg Kindschi d’eira chargiada bain cun arrandschamaints e sezzüdas da tuot gener, vaiva el amo adüna ün per sairas libras dürant l’inviern per giovar teater a Ftan.
Char Jörg, per tuot quai cha Tü hast tut per mans e fat per nus e per la gene-ralità, At ingrazchaina fich e da tuot cour.   

In nom dal circul da Suot Tasna, Otto Huber, actuar

 

Kategorie: 

KOMMENDE EVENTS

STELLEN

IMMOBILIEN

DIVERSES