Not Gottschalk, 1933 – 2015

Fr, 17. Apr. 2015

Not Gottschalk es nat a Sur En da Sent. in üna famiglia da paur. Il bügl immez il cumünet es gnü inaugurà da seis bap sül di da sia naschentscha. Perquai vaiva Not per quist bügl adüna üna relaziun tuot speciala.

Cur cha Not vaiva ses ons es ida sia famiglia a star a Sent, ingio ch’el ha passantà eir tuot seis ons da scoula e güdà in lur pauraria. Quai ha Not adüna fat gugent, uschè ch’el güdaiva eir plü tard sco prader adüna eir illa pauraria da sia parantella.
Dal 1949 es Not Gottschalk entrà aint il seminar da la scoula chantunala. Sorti dal 1953 sco giuven magister es el gnü elet ad Ardez, ingio ch’el ha instrui trais ons e manà il cor masdà.
In seguit ha bandunà Not Gottschalk l’Engiadina per surtour üna plazza a Herisau. Là ha’l dat scoula fin dal 1969. Quia ha el eir manà cun grond success il cor da baselgia e’s perfecziunà in sunar impustüt l’oboa, mo eir la clarinetta, il clavazin, la trumbetta, il saxofon, l’orgel da man e dafatta la lira. Culla brama da tuornar in Engiadina es segui Not Gottschalk ad ün clom giò da Zuoz e fat müdada cun sia duonna Silvia e sia figlia Anna Tina. Quia ha Not, grazia a seis duns musicals, manà il cor masdà, fundà e mis in chomma la musica da giuvenils.
Cun grond ingaschamaint e cugnuschentschas cumpositoricas ha Not s-chaffi bleras chanzuns per cor masdà, chanzuns chi vegnan da cour e van a cour.
Davo sia pensiun ha Not amo substitui tanteraint divers ons a Schlarigna.
Daspö l’on 2013 es gnü Not Gottschalk a star la stà cun sia duonna a Sent. Da sandà staiva el perè plü mal, uschea cha avant bundant ün on s’ha el stuvü render a l’ospidal ed in seguit, causa sia gronda deblezza corporala, a la Dmura d’attempats a Scuol. Davo repetids sogiorns a l’ospidal ha Not Gottschalk tut cumgià dals seis cun ün cuort suspür. Ch’el reposa in pasch.        

Autur: Balser Biert

Kategorie: 

KOMMENDE EVENTS

STELLEN

IMMOBILIEN

DIVERSES