In memoria da Jonpitschen Walther

Fr, 04. Sep. 2015

Pel cumgià da Jonpitschen Walther d’eira occupada la spaziusa baselgia da Sta. Maria fin a l’ultima plazza.

Quai demuossa la gronda stima cha’l defunt giodaiva in vasts circuls da la Val.
Jonpitschen Walther es mort davo lunga malatia in l’età da 79 ons. El es nat a Valchava sco figl il plü vegl dals quatter uffants da Jacun e Nina Walther-Gross. A Valchava, seis lö patria, ha el eir passantà cun pacas cuortas excepziuns tuot sia vita ed es eir gnü sepuli qua.
Davo la scoula primara in seis cumün ha el frequentà la scoula secundara a Sta. Maria ed alura il seminar a Cuoira per s’acquistar la patenta da magister. Sia prüma plazza es statta a Vnà. Plü tard ha el fat müdada a Valchava ed instrui ils ultims ons, davo la fusiun da las scoulas da Sta. Maria e Valchava, illa chasa da scoula nouva a Sta. Maria. Per motivs da sandà ha el gnü dad ir cun 56 ons antecipadamaing in pensiun.
1966 ha maridà Jonpitschen Walther a Corina Stupan. Lur lai es gnüda benedida cun ün figl. Dal 1971 han els eret a Valchava lur aigna chasa. La gronda paschiun e’l plaschair dal defunt es stat fin l’ultim la musica. Düraunt 20 ons ha el sunà dumengia per dumengia ils orgels da las baselgias dal Terzal d’aint. Blers ons è’l eir stat commember da la Musica Aurora ed ha eir dirigi quella. Annorums a la lunga ha’l fat part al Cor viril Alpina. Cun musica e chant han quistas duos societats tut cumgià in baselgia da lur fidel commember. La musica e’l chant vaiva’l in sias avainas. Da giuven davent ha el sunà la clarinetta ed imbelli cun quella, insembel culs legendaris «Rombachers», e plü tard in otras fuormaziuns, indombrabels bals in Val ed utrò. El s’ha però eir prestà sco cumponist da musica populara, scrit poesias ed intunà quellas. Ün exaimpel s’ha pudü udir in baselgia pro seis funaral.
Jonpitschen Walther s’ha però prestà eir sco correspundent dal Giuven Jauer e plü tard dal Fögl Ladin, rapportond da quist e l’oter evenimaint in Val. Da blers cuntschaints ed amis s’ha el eir algordà cun ün artichelet in gazetta. Politica nun ha’l mai fat, ma as prestà cun fats e cussagls in numerusas organisaziuns culturalas. Blers ons è’l eir stat chaschier da la raspada da Sta. Maria e Valchava. Nus til tgnain in degna e buna memoria.   

 Jon Mantaschal

Kategorie: 

KOMMENDE EVENTS

STELLEN

IMMOBILIEN

DIVERSES