Carlina Christoffel, 1931–2015

Di, 17. Nov. 2015

Ourasom vschinauncha da Schlarigna, a schnestra da la via vers San Gian sto la chesa Christoffel. Avaunt ans ho ella ars, uossa es la chesa renoveda e las algordaunzas peran dad esser turnedas.

In quist lö stret passaiva üna vouta il trafic per Puntraschigna, passaiva Hansi Guler culla scossa muaglia per ir our a Champagnatscha, cò sun gnieus e vegnan accumpagnos ils trapassos aint a San Gian.
Als 1. schner dal 1931 naschit la Carlina in quista chesa. Ad eiran già cò Gian Chasper, Carlin, la Lucie e Martin. Ils genituors, Chasper ed Anna Elisa tuochan aunch’hoz tal purtret da Schlarigna da quella vouta. A vzains a gnir a Chasper aint per vschinauncha cun sia granda charretta, cul van e la scua da perchas per scuer las vias, na fazöls da palperi e butiglias da plastic ma buatschas e grascha da chavals. Mincha di faiva el il gir da Surpunt fin süsom Crasta. El eira pur, faiva da bacher, scuaiva las vias, sunaiva il gïun e la tüba. Ad Anna Elisa vzains a mner la vacha chi mnaiva in talvo üna granda chargia d’fain u culla charretta per ir a ramasser lavdüras. Che duonna lavuriusa e svelta ed adüna da buna glüna. In quist ambiaint simpel e prüvo es Carlina creschida sü, es ida a scoula a Schlarigna, nun ho mê do andit a dispüttas u baruffas. Tuottüna la tantaiva minchataunt il zaclign. Inaspettedamaming faiva ella sguozchas a sia conscolara chi tschantaiva davauntvart, quella daiva ün sbreg e cur cha’l magister as vulvaiva eira la Carlina sgubeda suraint sieu quadern cun tschera seriusa ed innozainta.
Zieva la confirmaziun eira da metter binaris per l’avegnir. Zieva ün an giò la Bassa turmanteda da granda increschantüna turnet Carlina darcho a Schlarigna, persvasa da nu banduner mê pü l’Engiadina. Per mauns lavurius, per üna matta amiaivla cun bunas manieras eira occupaziun eir sü cò. Carlina lavuret in bgers hotels e da sias experienzas al Palace da San Murezzan quintaiva ella adüna darcho.
Il temp müdet bger scu dapertuot. Ils fradgliuns maridettan e dal 1959 murit la mamma, per la Carlina il mumaint da tegner chesa al bap sper la lavur. Dal 1965 dvantet ella mamma e Silvia es steda ün regal per ella e pel non. Intaunt cha la mamma giaiva a lavurer surpigliaiva il non la chüra, che ambiaint prüvo. Chasper Christoffel murit dal 1977 e laschet inavous ün grand vöd.
Zieva cha Carlina vaiva passanto 53 ans illa chesa paterna fet ella müdeda in ün’abitaziun in chesa Cumünela cun chadafö moderna, bagn, s-chodamaint centrel, grandas fnestras, ün oter muond. Quel ho ella pudieu giodair passa 30 ans. Intaunt eira ella eir dvanteda nona e las duos abiedgias Patrizia ed Alexandra la tgnaron in memoria scu nona prüveda ed amuraivla. Trimmis nun eira mê memma dalöntsch per ir tar la figlia e sia famiglia e per ellas es Schlarigna la vschinauncha da la nona.
Carlina ho adüna darcho piglio part als viedis culs attempos e la sted passeda ho ella giodieu dad ir in charrozza aint a Roseg a la reuniun da las annedas 28– 36. Chi vess dit cha poch pü tard sunessan ils sains per sieu funarel. La mort nun es gnida inaspettedamaing. Accidaints e problems da sandet vaivan consümo las forzas ed als 7 settember serret ella ils ögls per adüna. Tar inscunters aint a San Gian as discurriro adüna darcho da la Carlina. R.I.P.

Autura: Anita Gordon

Kategorie: 

KOMMENDE EVENTS

STELLEN

IMMOBILIEN

DIVERSES