Imprender rucki zucki

| Sa, 24. Sep. 2011

Daniel Manzoni, musseder da scoulina a Segl, ho s-chaffieu dal 2010 quatter cudaschets cun chanzuns rumauntschas per iffaunts da scoulina. Uossa do que quellas chanzuns eir sün disc cumpact, chanto dals «Rambazonis».

Dal 2009 ho Daniel Manzoni pudieu festager sieu 20avel giubileum da lavur. Per quist motiv ed our da spür plaschair da sieu manster, da la lingua rumauntscha e dals iffaunts chi sun stos, chi sun e chi giaron tar el in scoulina, ho el s-chaffieu il proget «Ramba Zamba». Que sun quatter quaderns, i’l format A4, cun 44 chanzuns «per s’allegrer, suter, chanter e rir», scu cha Manzoni declera. El ho scrit las melodias, il text e disegno las illustraziuns. «Mieu böt es sto da fer ün cudaschet da chanzuns per iffaunts pitschens, chanzuns simplas chi’ls restan güst in uraglia», disch Daniel Manzoni.

Nouvs s-chazzis da pleds
Ils texts da sias chanzuns sun bain inclegiantaivels per iffaunts a partir da quatter ans e sun illustros richamaing cun disegns chi güdan ad incler als iffaunts auncha pü bain il text. Ed uschè as chatta, per exaimpel tar la chanzun «Que’m plescha a nuder», sülla pagina daspera numerus disegns e’l nom d’urdegns cha’s drouva tar ün di i’l bagn aviert u a la riva dal mer. L’iffaunt po uschè güst eir imprender nouvs pleds chi haun dachefer cul tema «nuder/fer il bagn». Fich bain adatto sun ils cudesch uschè eir per iffaunts chi nun haun il rumauntsch scu lingua materna. Per exaimpel iffaunts da lingua tudas-cha u portugaisa chi visiteschan scoulinas u scoulas rumauntschas u bilinguas in Engiadina. «Ils iffaunts paun imprender uschè il prüm il s-chazzi da pleds cun agüd da las illustraziuns. In seguit inclegian els bain svelt las chanzuns e zieva poch temp sune buns da chanter tiers», disch Manzoni.
Sper chanzuns chi dessan in prüma lingia divertir e svaglier il plaschair pel chaunt e la lingua, as chatta eir chanzuns cun ün effet educativ. Uschè per exaimpel la chanzun «Rucki Zucki». I’s tratta d’ün mat, cul nom Rucki Zucki, chi fo uorden in sia chambra. El metta tuot bain a lö, e que cun plaschair. E chi sa, forsa funcziuna il fer uorden eir tar oters iffaunts pü bain, tadland speratiers il «Rucki-Zucki-Song».

Grand sustegn da collegas e collegs
Già elavurand ils quaderns da chaunt ho Manzoni gieu l’ideja da cumpletter tels cun ün disc cumpact. «Que chi manchaiva però per registrer las chanzuns d’eiran chantaduors e raps», s’algorda Manzoni. Per tuots duos es però gnieu chatto üna soluziun. Il proget es gnieu sustgnieu finanzielmaing da diversas firmas, instituziuns ed organisaziuns da l’Engiadina e dal Grischun. E las chantaduras e’ls chantaduors ho Daniel Manzoni chatto i’l ravuogl da professiun. «Eau d’he scrit ün e-mail a diversas mussedras, magistras e magisters culla dumanda schi hegian vöglia da’s parteciper scu chantaduors ad ün proget per registrer ün disc cumpact cun chanzuns per iffaunts», uschè Manzoni. La surpraisa e’l plaschair es lura sto grand cur ch’el ho survgnieu üna resposta positiva da 16 collegas e collegs da Zernez fin Segl. Insembel cun Daniel Manzoni e duos mattas fuorman quels la gruppa «Rambazonis». Gnieu registro es il disc cumpact dobel cul nom «Ramba Zamba» i’l studio da musica dals «Cervaholics» a Samedan.

Karaoke rumauntsch
Il disc cumpiglia 40 chanzuns, tuottas in rumauntsch e per part eir bilinguas, voul dir cun frasas o strofas p.ex. in tudas-ch, spagnöl u portugais. Impü cumpiglia il disc eir da tuot las chanzuns üna versiun be culla melodia (be i’l format MP3), sainza text. Uschè as po chanter tiers svess il text – üna sort karaoke rumauntsch.
Marculdi passo ho lura gieu lö il battaisem dal disc cumpact i’l Chesin Manella in preschentscha da bundant 70 persunas, pelpü mammas ed iffaunts. Tenor Pol Clo Nicolay, il mneder dal Chesin Manella, nu saja la sela dal Chesin Manella auncha me steda telmaing implida fin a l’ultima plazza scu tar quist arrandschamaint.
Ils quaderns e’l disc cumpact dobel «Ramba Zamba» sun üna fich bella sporta per iffaunts rumauntschs ed ün bun e serviziaivel mez per imprender rumauntsch per iffaunts da linguas estras.
Autorin: Myrta Fasser

Neuen Kommentar schreiben

CAPTCHA
Diese Frage soll automatisierten Spam verhindern und überprüft, ob Sie ein menschlicher Besucher sind

KOMMENDE EVENTS

STELLEN

IMMOBILIEN

DIVERSES