HomePolitikWirtschaftTourismusBildung/SozialesKulturSportGesundheit

Clà Filip Pitsch as retira per subit da la suprastanza cumünala da Val Müstair (fotografia: mad)

Clà Filip Pitsch as retira per subit da la suprastanza cumünala da Val Müstair (fotografia: mad)

Cla Filip Pitsch as retira da la suprastanza

Il suveran dal cumün da Val Müstair ha approvà in marcurdi il preventiv cumünal 2019 e fixà il pè d’impostas sün 120 pertschient. Implü ha infuormà Clà Filip Pitsch, ch'el as retira da la suprastanza cumünala per subit.

Sia motivaziun es, cha’ls process politics douvran massa bler temp per gnir realisats e ch’el saja affarist e na politiker. Il suprastant Gian Duri Conrad dal departamaint da construcziun surpiglia ad interim eir il departamaint agricul e forestal. L’elecziun dal successur da Clà Filip Pitsch es previsa in favrer 2019.

Eir ils preventivs dal center da sandà, dal PEM e dal Parc da natüra Biosfera Val Müstair han chattà l’acconsentimaint da la radunanza. Il preventiv dal quint da success muossa pro entradas da 13,41 milliuns francs e sortidas da 13,55 milliuns francs ün s-chavd da 144 300 francs. Las 45 votantas e votants han deliberà il preventiv cun gronda majorità.

La revisiun parziala da la planisaziun cumünala pel deposit da material Domuglins illa fracziun da Müstair e la ledscha da fabrica, reguard plazzas da parcar sun eir gnüdas approvadas. In seis preambel ha manzunà il president cumünal, Rico Lamprecht, la situaziun finanziala dal cumün da Val Müstair. La suprastanza cumünala s’es consciainta cha la situaziun finanziala es plütost flaivla. Masüras da spargn saran per l’avegnir indispensablas. Pro’l persunal daja prosmamaing divers chi van in pensiun e la dumonda centrala sarà scha quellas plazzas vegnan amo rimplazzadas o schi’s tira a nüz sinergias internas. Ils cuosts dals secturs sandà e social e las associaziuns cun instituziuns regiunalas chaschunan adüna daplü cuosts, sainza cha’l cumün pudess tour influenza. Las entradas e sortidas dal cumün da Val Müstair nu sun equilibradas, uschè chi’s sto preverer d’augmantar il chapital ester. Impustüt las entradas e sortidas dal ressort La Sassa varan üna grond’influenza sül resultat dal preventiv.

Autur: anr/pl