«Quist on es causa il coronavirus ün on turistic pretensius», ha dit Philipp Gunzinger, il president dal cussagl aministrativ da l’Engiadina Scuol Turissem SA (ESTAG) in mardi saira in sala cumünala da Scuol a chaschun da la radunanza generala. Grazcha a la fich buna stà e las bunas vistas per l’utuon s’esa tenor el «passà cun ün ögl blau». Uossa tscherchan ils partenaris insembel masüras realisticas per pussibilitar eir üna buna stagiun d’inviern. «Ün prüm pass vers l’avegnir dal turissem local prosperaivel es statta avant ün on e mez la reorganisaziun da l’ESTAG», ha’l dit.

Insembel cull’organisaziun regiunala
Mincha cumün illa regiun Engiadina Bassa Val Müstair dispuona d’üna instituziun chi s’occupa dal svilup turistic sün livel cumünal. «Cun reorganisar e megliorar sias structuras turisticas ha il cumün da Scuol surdat l’on passà nouvas incumbenzas a l’ESTAG», ha declerà Gunzinger, «ella s’ingascha in prüma lingia pels interess turistics locals, dess però eir esser ün forum per elavurar e fuormar ideas turisticas.» La prüma da las lezchas ed incumbenzas principalas da l’organisaziun turistica dal cumün pertocca la strategia turistica: «L’ESTAG definischa la strategia turistica dal cumün insembel culs respunsabels illas fracziuns in accord culla strategia da la Turissem Engiadina Scuol Samignun Val Müstair SA (TESSVM), cul svilup regiunal e culla strategia dal svilup local Agenda 2030.» Eir in collavuraziun culla TESSVM dess l’organisaziun turistica da Scuol coordinar dumondas ed activitats turisticas illas fracziuns.

Svilup da progets e da la sporta
Manader da gestiun da l’ESTAG es il promotur d’economia da Scuol, Niculin Meyer. El vain in funcziun pro las ulteriuras incumbenzas da l’organisaziun: «Iniziar progets e sustegner exponents pro activitats d’importanza turistica es üna da quellas», ha’l declerà, «lura sviluppaina e sustgnin ils exponents locals pro’l svilup da las sportas turisticas e spordschain plattafuormas pel barat da temas relevants cun partenaris turistics sün basa locala.» Ch’els coordineschan eir occurrenzas ed evenimaints sün livel cumünal e spordschan man ad iniziants da progets turistics, ha’l agiunt. Dal cussagl administrativ da l’ESTAG fan part sper Philipp Gunzinger il vicepresident Andrea Matossi e’l capo cumünal da Scuol Christian Fanzun sco rapreschantants dal cumün, Kurt Baumgartner chi rapreschainta l’hotellaria e la gastronomia, Martina Hänzi sco rapreschantanta dal commerzi, mansteranza e parahotellaria, Andri Poo chi rapreschainta las Pendicularas Scuol e Mario Rutz sco rapreschantant dals proprietaris da seguondas abitaziuns e commember da la suprastanza da l’IG ZWET Scuol.

Decisiuns sainza cuntravusch
Las contribuziuns finanzialas da vart dal cumün pussibilteschan a l’organisaziun turistica locala ESTAG, sco cha’ls respunsabels scrivan i’l rapport annual, «da realisar sias prestaziuns independentamaing». In tuot ha ella 1350 aczias. Preschaints a la radunanza generala d’eiran dudesch acziunaris chi rapreschantaivan 572 aczias. Las tractandas statuarias ha la radunanza dals acziunaris evas da maniera speditiva. Il rapport da gestiun 2019 e’l quint annual 2019 sun gnüts approvats unanimamaing. L’on passà ha l’ESTAG fat üna perdita da 5140 francs. La radunanza ha approvà sainza cuntravusch la proposta da la suprastanza da transferir quist import sül quint da quist on.

Autur: fmr/fa