HomePolitikWirtschaftTourismusBildung/SozialesKulturSportBlaulichtGesundheitNatur/Umwelt

20 ans Prefix. fotografia: Christoph Casty

20 ans Prefix. fotografia: Christoph Casty

«Urknall» Prefixian invezza da giubileum

In sanda vess festagio la band da rock rumauntsch, Prefix, sieu 20evel anniversari cun concert e festa a Zuoz e battagio in quell’occassiun güsta eir sieu nouv, terz album, numno «Oriund». Resto, a causa dal coronavirus, es be auncha la cumparsa dal disc compact.

10 dal 10 2020, que füss sto il grand di da Prefix. Ün di, chi vess sport dapü cu quist gö da cifras chi muossa via tenor guitarrist Rico Puorger sül giubileum da 20 ans rock rumauntsch made by Prefix. Planiso d’eira nempe üna granda festa illa Stalla Pundschermaun a Zuoz, culla partecipaziun da las bands indigenas Cervoholics, Dörti Karpet ed apunto, ils Prefix cul battaisem da lur nouv album.
Ma scu già lur concert planiso al Open Air da Chapella, es uossa crudo ill’ova eir quista granda festa da giubileum. «La situaziun actuela da corona nun s’ho laschos displaschaivelmaing üngün’otra pussibilted», deplorescha Puorger, «tuot oter nu füss simplamaing na sto güstificho». El imprometta però: «Nus pigliains zieva la festa subit cha que es darcho pussibel».

«Schnuaivel agreabel viedi ...»
Ün motiv, da’s listess allegrer sün prosma sanda es la cumparsa dal album «Oriund». Ün disc compact cun desch nouvs töchs rock rumauntsch our da la penna dals Prefix ed impü duos chanzuns – «Gloria» e «Gir dal muond» – chi d’eiran stedas publichedas già sül DVD «autentic – Prefix live 2017». A partir da sanda po gnir pusto il disc «Oriund» sur la pagina d’internet da Prefix ed ün di pü tard es alura eir pussibel da s-charger quel da las plattafuormas da musica üsitedas online. «Noss’idea d’eira natüralmaing, da vender uschè bgers discs pussibel düraunt il concert a Zuoz», disch Rico Puorger. Almain e per furtüna resta il «schnuaivel agreabel viedi tres il territori da rock rumauntsch» sün conserva.
Naschieu es il desideri da prodüer ün nouv, e zieva «Sgratta’m» dal 2006 ed «Adrenalin» dal 2011, terz disc avaunt precis ün an. «Nos keyborder Marco Niggli ramassa seriusamaing tuot nossas ideas musicalas, d’üna melodia da chaunt, sur ün riff da guitarra fin tar üna sequenza da clings da clavazin cha’ls singuls commembers da la band sternan.» Ad es zieva la band intera chi sviluppa inavaunt ün o l’oter da quists fragmaints ad ün nouv töch. «Fin finela», uschè Puorger, «vaivans dafatta memma bgeras chanzuns ed ans vains stuvieu dispütter pella schelta finela sül album».

Producziun 100 pertschient engiadinaisa
Prefix, fundo dal 2000, que sun il chantadur Andri Casty, ils guitarrists Rico Puorger e Curdin Urech, il bassist Christoph Casty, il keyborder Marco Niggli e daspö l’an passo, il batterist Andri Netzer, ex Overdose.
Pella prüma vouta s’han affidos Prefix illa producziun dal album «Oriund» per bod 100 pertschient sün qualited engiadinaisa. Per Rico Puorger üna fich buna decisiun: «Düraunt ils duos mais da registraziun i’l studio a Schlarigna vains pudieu profiter da l’infrastructura ourdvart professiunela dal Studio Engiadina da la band «Skywards», pella producziun ho pissero il Zuozhinger Walter Kopatz e pella grafica dal disc, chi spordscha eir ils texts rumauntschs in fuorma d’ün booklet, Oli Teutsch da Samedan chi vaiva survgnieu da la band maun liber illa grafica dal disc. L’unic chavazzin: il nom da l’album «Oriund» chi, in quist cas, sto pel sfratsch primar, l’Urknall. Las duos propostas finelas da Teutsch haun darcho pissero per dischuniun illa band, uschè, cha tuottas duos haun chatto via sül cover.

Vinyl limito scu regal da giubileum
«Oriund» persvada però in prüma lingia cun sieu cuntgnieu: cun intro e suppost outro in möd innaspetto, cun duos balladas – «Do’m tieu maun» chi pudess bainsvelt dvanter la nouva imna per futurs concerts e «Sandet», ün toch quiet, acustic e culla partecipaziun dal cellist Gyula Petendi – ma pel rest surtuot cun musica da rock chi merita il titel «Oriund» sur bod tuot ils töchs. «Purtrets» per exaimpel, ün töch svelt e melodius, il cumanzamaint intensiv cun «Patria», ils töchs da rock dür cumbino cul chaunt intensiv Prefixian scu «Dai» u «Tir’ün fil» u il penultim töch «Ulfur» chi spordscha cun passa nouv minuts düreda e sviamaints i’l classic-rock megldras premissas pels prossems concerts. L’uni chi mauncha sülla cuvertina dal disc es l’avis: «Play it Loud!»
A la fin auncha la buna nouva per tuot ils amatuors da vinyl: Düraunt il november vain publicho «Oriund» in ün’ediziun da be güsta 100 exemplers scu album dobel cun 180 grams vinyl. «Quist es nos regal da giubileum a nus svessa», conclüda Rico Puorger. «Nus vains però bainsvelt bado, cha a prodüer be güsta ses albums vinyl per nus nu cunvegn me.» Finanzielmaing nu cunvegn que neir per 100 albums. Ma tar ün regal nu’s guarda sül predsch, nischi?

Ulteriuras infuromaziuns e postaziun da disc ed album vinyl suot: www.prefix-rock.ch.

Autur: Jon Duschletta


Noch keine Kommentare

1000/1000
  • Bares für Rares
  • 3-GANG
  • SCHWEIZER DIGITALTAGE
  • Ab 1. Dezember 2020 ganzjährig
  • Volgrezept
  • Seit Jahren agieren wir als erfolgreiches Elektro-
  • Pontresina Wochentipp
  • CH – 7514 Sils im Engadin
  • Zur Ergänzung des Teams sucht die Gemeindeschule St. Moritz infolge Pensio-
  • Rutz
  • FORUM PARACELSUS VOM 2. BIS 22. NOVEMBER
  • BAG
  • GESUCHT
  • CINEMA REX