HomePolitikWirtschaftTourismusBildung/SozialesKulturSportBlaulichtGesundheitNatur/Umwelt

Il nouv possessur da l’Hotel Villa Maria, Johann Brugger, voul surtour eir l’Hotel Schweizerhof a Vulpera (fotografia archiv: Jon Duschletta).

Il nouv possessur da l’Hotel Villa Maria, Johann Brugger, voul surtour eir l’Hotel Schweizerhof a Vulpera (fotografia archiv: Jon Duschletta).

Ün investur voul reactivar Vulpera

Ün investur dal Tirol dal nord voul dar nouva vita al lö da vacanzas da Vulpera. Seis möd d’investir in hotels procura per dubis.

Vulpera, üna fracziun da Scuol situada a dretta da la val, es cuntschaint sco lö da vacanzas. Hotels gronds e las funtanas d’aua minerala invidaivan als giasts da gnir a far la cura in Engiadina Bassa, ed impustüt a Tarasp-Vulpera. Daspö ons sun ils gronds hotels vöds e per part acquistabels. Ün investur dal Tirol dal nord voul activar darcheu il cumünet da vacanzas da Vulpera.
Johann Brugger ha cumprà d’incuort a Vulpera l’Hotel Villa Maria e la Villa Silvana. L’Hotel Villa Maria es situà a Chants, ün lö tanter Vulpera e Tarasp ed in vicinanza da la plazza da golf. L’intent da Brugger es da manar inavant la gestiun cul concept da l’anteriur possessur. «Eu less manar inavant la Villa Maria sco fin qua e n’ha eir ün pêr ideas per adattar la sporta», ha’l declerà a seis temp a la FMR. El prevezza da manar quel il prüm cun pacas investiziuns e cun ün pa bellet. Avant co rivar a Vulpera vaiva Brugger tut a fit l’Hotel Aurora ad Ardez, quai cun l’idea da til cumprar. Bainbod s’ha el distanzià da quel intent. Percunter prevezza il cuschinunz e financier da cumprar l’Hotel Schweizerhof a Vulpera e cun quel güst eir ün ulteriur hotel ad Arosa.

Investiziuns sainza chapital agen
Il möd da finanziaziun dal cuschinunz chaschuna per blers segns da dumonda. Tanter oter vain dumondà co ch’ün cuschinunz es capabel da finanziar talas investiziuns sainza chapital agen. Johann Brugger fa qua ün oter quint: «Ils fittadins pajan per ün pêr ons ouravant il fit per l’hotel». E quist chapital vain reinvesti in nouvs ogets. Plünavant sustegnan, tenor sias indicaziuns, la bancas seis plan da finanziaziun. A Vulpera nu’s cugnuoscha amo inandret l’investur tirolais. Brugger inclegia ils dubis dals indigens. Tenor el ha la regiun però be duos opziuns: «Las portas dals hotels restan o avertas o serradas».

Ils dubis dal cumün
Per Scuol e sia fracziun Vulpera füss üna revitalisaziun dals hotels serrats ün svilup positiv. Christian Fanzun, il capo cumünal da Scuol, ha però tscherts dubis invers l’investur. Johann Brugger spetta sustegn da tuot las varts ed il cumün da Scuol ha fingià fat noschas experienzas cun investurs chi impromettan bler cun pleds da pac’importanza. «Eu n’ha adüna dubis, quai eir perche cha nus nu pudain giovar culs mezs publics», uschè il capo cumünal da Scuol. «Nus stuvain avair üna tscherta sgürezza chi’ns garantischa ün svilup positiv per la regiun e’l cumün.» Per cha’l cumün investischa in l’infrastructura da Vulpera faja dabsögn da plans concrets davart da l’investur. «Eir stessna savair daplü da la persuna Johann Brugger, chi sa esser fich directa e chi dà cuntschaint be pacs detagls.» Il cumün da Scuol es rivà cun sias retscherchas fin i’l Zillertal, la patria da Brugger. Quai però cun pac success. «Nus stuvain restar inavant precauts ed istess dar la pussibiltà da restar cun nus in contact», conclüda Christian Fanzun. Uschè restaran las ideas da Brugger ün’ulteriura visiun per reactivar Vulpera.

Text: rtr/fmr


Noch keine Kommentare

1000/1000
  • Nachtarbeiten
  • Rutz – Erbstaktion