HomePolitikWirtschaftTourismusBildung/SozialesKulturSportBlaulichtGesundheitNatur/Umwelt

Bibi Vaplan ha publichà seis nouv song «Crazy Popcorn 1», chi’d es il cuolp da partenza per la «Popcorn-Opera» (fotografia: Ida Sgier).

Bibi Vaplan ha publichà seis nouv song «Crazy Popcorn 1», chi’d es il cuolp da partenza per la «Popcorn-Opera» (fotografia: Ida Sgier).

Sigliantar cunfins e tschüffer las stailas

Bibi Vaplan fa ün pa sco il pitschen prinzi, ella voul tschüffer las stailas ed ella svoula eir cun sia raketa. Il böt da la chantautura es da conquistar la glüna. Quai tuna bainschi curius, però in sia nouva chanzun «Crazy Popcorn 1» para tuot pussibel. 

Cun sia «Popcorn-Opera» voul Bibi Vaplan preschantar ün’explosiun artistica in tuot las direcziuns e far star il muond sül cheu. Bibi Vaplan va tuot oter co plan. Ün pa sco cha’l popcorn sigliainta in tuot las direcziuns, han eir las ideas da la chantautura ladina, chi’d es creschüda sü a Scuol ed abita a Lumbrein, ingüns cunfins. Il program vain lantschà culla prüma chanzun «Crazy Popcorn 1», cun l’acziun «Extra Life» ed i va inavant cun surpraisas ed eir ün gö da video per il qual i seguarà ün app dal 2021. Sül program stan eir filmins, litteratura, invenziuns, mini-festivals e bler oter chi vain publichà sün differents chanals da socialmedia e la hompage: www.popcornopera.ch.
«Quai tuot tuna forsa ün pa da stuorn, ma quai nu fa nüglia, da quai dal minchadi daja avuonda ed in mia opera es tuot pussibel. Eu less intermediar ün nouv sentimaint da la vita chi dess schluppetar oura sco ün popcorn», quinta Bibi Vaplan, alias Bianca Mayer. Ün bigliet d’entrada annual per l’opera, inclus surpraisas persunalas, üna da las 249 plazzas illa raketa, l’access a tuot il program online o live daja da cumprar online. Quant lönch cha la «Popcorn-Opera» dürarà, sta tenor la chantadura, scriptura ed artista engiadinaisa amo illas stailas.

Model futuristic
L’idea ha gnü Bibi Vaplan fingià avant ons, daspö raduond ün on as concentrescha ella sülla realisaziun e scriva eir vi dal cudesch «Baby, kauf mir eine Autowaschanlage!». Previs vaiva l’artista da publichar pür cur cha tuot füss stat a fin in versaquants ons. «Intant esa üna lavur in progress ed eu vuless reagir sülla situaziun, perquai n’haja decis da nu gnir cun tuot sün ün schlop, dimpersè da far ün pass davo l’oter.» Perquai cumainza Bibi uossa cul prolog, per laschar seguir l’uvertüra ed ulteriuras parts – ün pa sco üna «dretta» opera. Ma per üna chantautura es quai ün möd da lavurar artisticamaing tuot nouv e sco cha quai para eir totalmaing corona-conform? «Eu n’ha cumanzà fingià avant corona cul proget, sainza savair cha quai pudess dvantar üna fuorma artistica ideala per l’avegnir. Forsa n’haja gnü üna visiun futuristica insacura e quella es corona-conform sainza vulair», ha respus Bibi Vaplan.

Müdar vitas
L’opera – chi’d es tuot oter co üna opera üsitada – dess müdar vitas e büttar a Bibi e tuot ils oters our da las soccas. «La scena da musica nu funcziuna plü co üsità, perquai am n’haja confruntada cun dumondas fundamentalas ed existenzialas per mai sco artista», ha declerà la duonna plain temperamaint. Uschè surpassa la chanzun nouva eir visualmaing cunfins. I’l video da musica as müda Bibi Vaplan in ün’eroa dal gö da computer. Per Roccobello e Leon ramassa ella extra-vitas in fuorma da cours. In ün livel as bütta ella perfin tras üna discoteca da Covid. Spess süls chalchogns segua il polizist grit Peter ed in quel s’inamurescha l’eroa a la zoppada. Cun extra-vitas lavura Bibi Vaplan intant eir illa vita reala ed ella as sfadia per ramassar avuonda extra-vitas pels vadels Roccobello e Leon, duos vadels chi sun dal paur Flurin Capaul da Lumbrein. Quant lönch cha’ls vadels pon viver e far part da la «Popcorn-Opera» nu decidan be l’artista ed il paur, mobain l’inter univers chi invida da bandunar la zona da comfort raziunala e far alch da nonsens our da pür plaschair d’esser nar. Minchün po regalar als vadels ün zich temp da vita avant co ch’els ston ir pro’l bacher. Sülla pagina da la «Popcorn-Opera» as poja pajar per regalar vita a Roccobello e Leon. Chi sà, forsa dvaintan ils vadels da Lumbrein ils vadels ils plü cuntschaints da la Svizra. 

Text: fmr/sr

fotografia: Ida Sgier


Noch keine Kommentare

1000/1000
  • Leiter/in Unterhalt & Technik (100%)
  • Black Friday
  • Wir machen Büros effizienter.
  • SAISONERÖFFNUNG
  • Pontresina Wochentipp
  • Zu verkaufen an Selbstbewirtschafter:
  • Ei, Ei, Ei!
  • Pontresina - Chesa Randolina
  • PolyClinic St. Moritz AG
  • St. Moritz Partner of Savills international
  • Franziska Preisig
  • Corviglia
  • RETO METTLER
  • Gian Peter Niggli
  • Gemeinde Celerina
  • Beschütze
  • 3-Zimmer-Wohnung – Champfèr
  • Traditionelle Silvaplaner Hausmetzgete