D’incuort ha invidà la Comunità da vaschins da Scuol ad üna radunanza. Illa sala cumünala ha pudü bivgnantar Jon Fadri Tönett, il president da la comunità, a divers vaschins. Ils preschaints han approvà tuot las tractandas, tanter oter il rendaquint da l’on 2019 e la vendita da terrain per la via chantunala tanter Scuol ost e la punt San Valentin.

Renovà la Tuor Vonzun
Il cumün o la comunità da vaschins da Scuol ha actualmaing var 1500 vaschinas e vaschins, da quels sun 1250 cun dret da vuschar. «Ingon sun gnüts pro ot nouvs vaschins chi abitan a Scuol ed implü quatter persunas i’l möd simplifichà, voul dir tras la marida», ha manzunà Jon Fadri Tönett. Il cumün da vaschins es proprietari da tuot il terrain dadour las zonas sco eir da diversas parcellas cun dret da fabrica. Plünavant tocca la chasa da vaschins giò Punt a Scuol, la Tuor Vonzun ad Ardez e diversas otras parcellas a la comunità. La renovaziun da la Tuor Vonzun ad Ardez ha procurà per cuosts da bundant 200 000 francs. La radunanza ha approvà la dumonda per ün credit supplementar da 10 000 francs. La Tuor Vonzun o «La Praschun», sco ch’ella vain eir nomnada ad Ardez, ha servi sco lö d’abitar sgür per üna famiglia nöbla e per l’ovas-chia da Cuoira, sco lö per praschuners o lura sco chasa da povers e sco allogi pel militar. Dürant ils ultims ons es la tuor gnüda renovada. Hoz serv’la sco lö d’inscunter e spordscha lö per da tuottas sorts activitats.

Ils drets da las funtanas
Sün iniziativa dal cumün da vaschins s’han occupats ils organs cumpetents insembel cul cumün politic culla revisiun dal reglamaint davart il fuond da rechav da terrain. E quai güsta in cumbinaziun cun l’intent da zavrar la proprietà da lur bains immobigliars. Uschea s’haja pudü s-chaffir relaziuns da proprietà e da respunsabiltà cleras ed evidaintas tanter ils duos cumüns. «Parcellas importantas chi sun gnüdas transferidas dal cumün da vaschins a quel politic sun Gurlaina e pro’l camping a Sur En da Sent», ha declerà il president. Plünavant ha’l rendü attent als drets vi da tuot las funtanas d’aua minerala sün l’inter territori dal cumün da Scuol a favur dal cumün da vaschins da Scuol. «Per quista fin e mera dessan dimena in princip restar in proprietà dal cumün da vaschins da Scuol tuot las parcellas, süllas qualas naschan funtanas d’aua minerala, respectivamaing ingio chi’s rechattan inchaschamaints, edifizis o implants pel consüm d’aua minerala», staja scrit i’l contrat concernant il transferimaint da proprietà tanter ils duos cumüns.

Autura fmr/afi