Sco cha’ls respunsabels da la Chascharia Val Müstair scrivan illa comunicaziun als mezs da massa das-cha il team esser superbi: «I nu s’inclegia da sai cha davo chi s’ha fabrichà nouv la fin da l’on 2018 funcziuna la producziun uschè bain sco avant.» Plünavant vegna manzunà, cha’l plaschair da la terza plazza al champiunadi mundial saja fich grond e detta blera satisfacziun. «Davo fich blera lavur e grondas fadias a favur da la qualità faja fich grond plaschair da rivar sül podest dal champiunadi mundial», vain cità Janic Fasser, il mainagestiun da la chascharia Val Müstair, chi cuntinua ed ingrazcha a seis collavuraturas e collavuratuors, «premis da quist gener sun be pussibels grazcha a la buna collavuraziun da tuots».
Il lat in Val Müstair vain prodüt tenor las directivas da Bio Suisse e las vachas vegnan pasculadas da stà e d’inviern. Ellas vegnan pavladas cun fain ed argör sech, correspundaintamaing a las prescripziuns da la Bio Suisse.
Il team da la chascharia Val Müstair dà grond pais da prodüer il chaschöl Jauer tenor recept vegl e dà eir gronda chüra cha’l chaschöl madüra bain e survain uschè seis bun gust. (fmr/afi)