La concurrenza svizra da las linguas Linguissimo vain organisada daspö il 2008 dal Forum Helveticum. Il final da la dudeschavla ediziun han guadagnà giuvenils dals chantuns da Friburg, Berna, Grischun e Vad. Quai sun las auturas ed ils auturs dals trais meglders texts chi sun gnüts scrits in tandems plurilings. Ils giuvenils guadognan ün viadi cumünaivel in üna cità europeica obain ad ün’occurrenza culturala in Svizra. Da passa 230 texts inoltrats da giuvnas partecipantas e da giuvens partecipants da 16 fin 21 ons da tuot la Svizra sun gnüts tschernüts las finalistas ed ils finalists da las quatter regiuns linguisticas. A chaschun dal final a Bellinzona s’han inscuntrats ils giuvens scripturs talentats cun auturas ed auturs svizzers: Flavio Stroppini (TI), Christine Schmocker (BE), Michaël Perruchoud (FR) ed Annina Sedláček (GR). Els han introdüt ils giuvenils illa tematica dal scriver tocs da teater. Ün ulteriur punct culminant da la fin d’eivna es stat il concert dal musicist tessinais Marco Zappa. In dumengia davomezdi han las finalistas ed ils finalists preschantà a la giuria lur scenas da teater cumpiladas in tandems plurilings. Las ses victuras e victurs da l’ediziun 2020 derivan dals chantuns da Friburg, Berna, Grischun e Vad e rapreschaintan üna giuventüna svizra averta ed inspirada da las differentas culturas da seis pajais. (sp)