Cinzia Regensburger d Benjamin Bechtiger dürant il Musical a Scuol (fotografia: Marco Cadonau

Cinzia Regensburger d Benjamin Bechtiger dürant il Musical a Scuol (fotografia: Marco Cadonau

Cun paschiun e bler ingaschamaint

Var 470 persunas han visità in gövgia saira la premiera dal Musical a Scuol. L’inizianta ed organisatura Cinzia Regensburger cun tuot la cumpagnia da giuvenils, han persvas cun musica, chant e sots, ma impustüt eir cun ün’istorgia captivanta e dialogs emoziunals. 

In gövgia saira es stat quia il grond mumaint per Cinzia Regensburger da Scuol ed üna quarantina da partecipants, per gronda part giuvenils da la regiun: la premiera dal Musical a Scuol cun musica dals ons 80. Raduond 470 persunas han visità quist spectacul chi ha surprais na be cun musica e sots, dimpersè eir cun ün’istorgia captivanta e dialogs emoziunals. L’istorgia svess, animada eir dal film «Footloose», es hozindi tant actuala sco plü bod. Dürant la pandemia han impustüt ils giuvenils stuvü ceder e las grondas festas sun stattas scumondadas. Eir i’l Musical a Scuol scumanda il ravarenda festas e bals causa ün accidaint mortal da quatter giuvenils, üna da quels eir seis agen figl. Ils giuvenils as dostan cun partis scumandadas alcohol e drogas. Uschè vain tematisada ill’istorgia eir la scena da drogas da quella jada in Engiadina ed a Turich. A la fin ha il ravarenda però incletta pels giavüschs e pissers dals giuvenils ed il Musical a Scuol finischa cun üna gronda festa. 

fotografia: Marco Cadonau
fotografia: Marco Cadonau
fotografia: Marco Cadonau
fotografia: Marco Cadonau
fotografia: Marco Cadonau
fotografia: Marco Cadonau
fotografia: Marco Cadonau
fotografia: Marco Cadonau
fotografia: Marco Cadonau

Minchün ha pudü tour part

Cinzia Regensburger da Scuol es inizianta ed organisatura dal Musical a Scuol. Intant cha’l musical da l’on passà cul tema burlesque d’eira gnü organisà plütost spontanamaing ed a cuorta vista, ha la giuvna studenta da musica investi quista jada daplü temp ill’organisaziun. Ella ha gnü in mincha mumaint las mastrinas in man ed ella ha persvas illa rolla principala insembel cun Simon Hänny da Sent, chi visita daspö ün on la scoula da musical a Hamburg. Cun Lucia Parolini e Benjamin Bechtiger da Scuol, han gnü duos ulteriurs giuvnots indigens, rollas importantas in quist’istorgia captivanta. E mincha rolla es gnüda adattada a las qualitats da mincha singul actur. 

Cun paschiun ed amur pel detagl

«Minchün chi ha vuglü as partecipar, ha pudü tour part», ha quintà Cinzia Regensburger dürant la preparaziun. Cha ingün nu saja gnü exclus. E tuot ils partecipants ingrazchan per la fiduzcha cun üna preschantaziun fascinanta. 

La paschiun dals giuvenils per quist proget as bada in tuot ils detagls. Fingià l’entrada sül plazzal da festa es decorada cun fotografias e gazettas dals ons 80 e dafatta ils «Comics» da Paulin Nuotclà vegnan preschantats sün üna paraid. Dafatta il «Bravo» cun ün’ediziun bel ed aposta pel Musical a Scuol nu das-cha mancar – eir scha’l ravarenda ha vairamaing scumandà da leger quist magazin da giuventüna. Quist’ediziun speciala dal «Bravo» vain vendüda sül plazzal insembel cun oters prodots chi sun gnüts realisats e zambriats svess. Ed eir il palc – circundà d’üna dunzaina dad oldtimers dals ons 80 – persvada cun bler’amur pel detagl. Tuot es in simbiosa e muossa impreschiunan-tamaing che lavur chi sta davo quist’iniziativa da la giuventüna indigena. E schi’s vezza il resultat, s’haja eir incletta per las emissiuns da canera da las ultimas sairas a Scuol. 

Las ultimas preschantaziuns dal Musical a Scuol han lö in sonda, ils 30 lügl, a las 16.30 ed a las 21.00. 

Text e video: Nicolo Bass

Fotografias: Marco Cadonau


Noch keine Kommentare