Bibi Vaplan metta la vschinauncha sül cho

Ils pleds festivs in occasiun da las festas dals prüms avuost haun üna lungia tradiziun. Bgeras vschinaunchas in Engiadina haun respetto eir quist an las tradiziuns ed haun ingascho ün referent pel pled da festa. Las pü grandas plattafuormas haun gieu ils politikers: il cusglier dal stedi Hans Stöckli ho discurrieu a Bever, la cusgliera naziunela Anna Giacometti dafatta a Samedan ed a Guarda, ed a Zernez il cusglier guvernativ Peter Peyer. Sieu collega regent Jon Domenic Parolini ho discurrieu in sia vschinauncha patria a Scuol sur dal dret da vuscher da las duonnas. Eir duos politikers pensiunos da renom internaziunel sun gnieus a pled: l’anteriur prümminister da la Germania Gerhard Schröder a San Murezzan (vaira pagina 3 da quist’ediziun) e l’anteriur president da la Confederaziun da la Germania Christian Wulff. Per l’economia ed il turissem haun discurrieu Caspar Coppetti, iniziant da las s-charpas ON, a La Punt, Tina Boetsch, directura ESTM AG, a S-chanf, Martina Stadler, directura TESSVM, a Ftan, Andri Poo, directer Pendicularas Scuol, a Sent e Ladina Heimgartner, CEO Blick Group, a Tschlin. 

Be singulas vschinaunchas haun lascho gnir la cultura a pled: Per exaimpel l’artista Flurina Badel ad Ardez o lura la chantadura Bibi Vaplan a Sils/Segl Maria. Güst ella ho savieu metter ün’intera vschinauncha sül cho. Cu füss que nempe, scha tuot la vschinauncha – u almain scha tuot quels chi piglian part a la festa dals prüms avuost – fessan il pozzamaun? Que dess automaticamaing üna nouva perspectiva süls affers cumünels. E dal rest vess que eir ün grand effet mediel. La presidenta cumünela Barbara Aeschbacher da Sils/Segl Maria nun ho be tschercho insembel cun Bibi Vaplan üna nouva perspectiva, ella ho eir chatto üna nouva via da comunicaziun. Il pled da festa es nempe gnieu deraso per video in maniera virtuela online ed illas medias socielas e nun ho gieu lö scu üsito in otras vschinaunchas fisicamaing sülla plazza da festa. Il pled cumplet cun l’introducziun e las ponderaziuns da la presidenta cumünela da Sils/Segl Maria, Barbara Aeschbacher, as chatta suotvart.

Text: Nicolo Bass