Cun quista nouva seria da concerts i’l giardin da la Chesa Planta Samedan s’ho in dumengia zievamezdi, ils 8 avuost, aviert eir quist spazi al public. Bgeras amias e bgers amihs da la musica haun pudieu giodair il prüm concert suot tschêl aviert, sainza ün guot plövgia. 

Il Steidle Trio da San Murezzan, chi consista da Werner Steidle e sias duos figlias Sabrina e Valeria, ho realiso il prüm concert d’üert. El es cuntschaint per sieu vast repertori chi cumpiglia musica classica, jazz scu eir musica populera. Illa Chesa Planta Samedan, il center culturel per la cultura e lingua rumauntscha, haune pünavaunt suno e chanto varsequauntas chanzuns rumauntschas. La particularited da l’occurrenza es steda, cha la giuvna S-chanfinra Selina Duschletta ho prelet quella poesia cun la quela ella ho gudagno dal 2019 il prüm premi da la concurrenza da scriver «Pledpierla» da la Lia Rumantscha. Il Steidle Trio ho in seguit preschanto lur versiun musciala da la poesia – e s-chaffieu uschè üna nouva chanzun putera: Che bel, cha trais abitants da San Murezzan haun – scu cha Selina scriva in sia poesia – «surpiglio la respunsabilted, per la cultura e l’identited.»

Text: Martina Shuler-Fluor