Ün viadi musical i’l muond da Clo Duri Bezzola

Raduond 120 uffants da la scoulina fin terza primara da Scuol han giodü in venderdi passà il concert da Martin Bezzola ed Ursina Giger. Els sun stats l’eivna passada sün turnea illas scoulas da l’Engiadina Bassa ed han preschantà las chanzuns d’uffants da Clo Duri Bezzola chi sun gnüdas ramassadas i’l nouv cudesch da chant cun disc compact «Il lung viadi». «Il prüm n’haja gnü respet da chantar davant tants uffants», ha dit la chantadura Ursina Giger. Però ils uffants s’han laschà tour sül viadi musical ed han accumpagnà chantond ils duos musicists tras mincha chanzun. «Quai fa bain il cour da dudir ils uffants e da badar lur plaschair per las chanzuns», ha dit Martin Bezzola. Per el esa insomma stat ün mumaint fich emoziunal, da pudair preschantar las chanzuns cha seis bap vaiva scrit dals ons 80. Da badar uossa, cha eir ils uffants d’hozindi cugnuoschan quistas chanzuns til ha fat grond plaschair. Il concert a Scuol es gnü organisà da las respunsablas da la Biblioteca a Scuol sco alternativa per la «not da las istorgias» chi nun ha pudü gniar realisada quist on. 

Ün agen stil per mincha chanzun

Dürant la pandemia ha Martin Bezzola realisà il proget dal cudesch da chant cun illustraziuns da Pia Valär. Causa cha Clo Duri Bezzola vaiva scrit las chanzuns cul clavazin e sainza arrandschamaints, es statta la sfida per Martin Bezzola da dar a mincha chanzun ün agen stil. El s’ha laschà influenzar dals texts per chattar il stil da musica per mincha chanzun. Ed uschè han ils uffants dudi chanzuns cun ritems da l’America latina, musica da reggae o da rock. Insembel cun Ursina Giger ha Martin Bezzola savü inchantar ils uffants a Scuol. Però cha las chanzuns nu plaschan be als uffants, han ils duos chantadurs muossà d’incuort eir als Dis da litteratura a Domat. Là s’han els preschantats cun üna band cumpletta, e per ün mumaint s’han eir il creschüts laschats tour sün ün viadi fantastic. 

Cuntinuar il viadi musical

Illa cumbinaziun tanter concerts per creschüts ed uffants, chattan Martin Bezzola ed Ursina Giger gronda satisfacziun. Perquai han eir els grond plaschair da pudair cuntinuar cul lung viadi in differents lös e per ün public d’uffants e restants uffants da tuot las etats. 

Text, fotografia e video: Nicolo Bass