Daspö la preschantaziun dal stüdi d’opportunità da la Grischconsulta AG dal 2012 a reguard üna colliaziun da tren tanter l’Engiadina Bassa ed il Vnuost, esa lönch stat quiet intuorn quist proget visiunari. L’uschè nomnada Storta tirolaisa paraiva da crescher aint e las differentas variantas per üna colliaziun ramassaivan puolvra in ün chaschuot a Cuoira. Daspö duos ons ha quist tema darcheu surgni vent e las trattativas paran da cuntinuar. Eir la gruppa da lavur «Pro Bahnverbindung Scuol Mals» chi unischa persunalitats da politica, turissem e trafic public, es dvantada activa e stumpla e sforza in tuot las direcziuns. Las regenzas da chantuns e provinza han intant bainschi suottascrit üna cunvegna d’intenziun, però la balla vain stumplada vi e nan sur muntognas e cunfins. Eir l’impromischiun dal Landeshauptmann dal Tirol dal Süd, Arno Kompatscher, es pac concreta. El vaiva nempe impromiss, cha’l Tirol dal Süd e l’UE surpigliessan raduond 75 pertschient dals cuosts da fabrica d’üna colliaziun da Scuol a Mals. Il privel es però grond, cha quistas impromischiuns sun vanas, schi nu segua üna decleranza impegnativa. Perquai esa fich salüdaivel, scha la Regenza grischuna voul inoltrar il proget per üna colliaziun da tren dal 2022 a la Confederaziun per cha’l proget vegna resguardà i’l plan d’acziun STEP 2040/45. Però independent da quai ston ils respunsabels tscherchar il contact e concretisar las trattativas cul Tirol dal Süd per ragiundscher ün acconsentimaint obliant. Inschinà passa insacura ün tren da l’Austria sur il Pass dal Reschia sainza tour la Storta tirolaisa in direcziun da Scuol. Eir quist proget es nempe fingià in movimaint.

Commentar: Nicolo Bass