Daspö il mais gün han tschinch artistas ed artists engiadinais – Jon Bischoff, Lea Meyer, Madlaina Janett, Paulin Nuotclà e Pia Valär – expost lur ouvras illustrativas fich diversas illa Chasa Jaura. Tuot lur lavurs sun stattas unidas suot il titel d’exposiziun «Illustraziun sco fuorma artistica».

Ils duos artists e las trais artistas saran eir da la partida a la finissascha da l’exposiziun. Quella es in sonda, ils 15 d’october, a Valchava e vain terminada cun üna discussiun al podium. La dumonda da la saira sarà: «Es illustraziun ün’art?» – Las artistas ed ils artists discutaran quista dumonda cul expert per illustraziuns da cudeschs Hans ten Doornkaat. El es stat docent a la «Hochschule Luzern Design & Kunst» e scriva tanter oter eir regularmaing illa «NZZ am Sonntag» davart litteratura per uffants. (cdm/fmr)