Ün cler schi al proget da Scoula Scuol+

Illa fracziun da Scuol mancan las localitats da scoula. «Quai es fingià hoz problematic per l’instrucziun», as legia il pream da la missiva davart il proget Scoula Scuol+, «e dürant ils prossems ons s’augmainta il nomer da scolaras e scolars amo.» Perquai ha la cumischiun «Scoula Scuol+» elavurà ün proget ch’ella nomna «detretschamaint dals edifizis da scoula e cumünals».

Proget «detretschamaint»

Il proget «detretschamaint» prevezza da centralisar a Scuol tuot la gestiun cumünala illa Chasa du Parc. La scoula invezza dess avair sias localitats illa chasa da scoula existenta, in ün nouv edifizi annex a la part nouva da la chasa da scoula ed illa chasa cumünala chi d’eira gnüda fabrichada a seis temp sco chasa da scoula. Per la scoulina gnaran fabrichats duos edifizis nouvs chi rimplazzaran la Chasa Central e’l provisori «Mailer». Ils cuosts totals per tuot il proget chi gnarà realisà in etappas s’amuntaran a 35 milliuns francs.

Votumaziun consultativa

In settember ha il cumün invidà ad ün’occurrenza d’infuormaziun davart quist proget. La radunanza cumünala ha in october lura deliberà il proget per mans dad üna votaziun consultativa. In quell’occasiun han las votantas e votants da Scuol eir acceptà ün credit da planisaziun da 500 000 francs per cuntinuar culs prossems pass pel proget «Scoula Scuol+». Per eruir l’opiniun da la populaziun areguard quist proget ha il cumün organisà üna votaziun consultativa: Cun s-chars 80 pertschient cunter bundant 20 pertschient (633:160 vuschs) hail suveran dit in dumengia schi al proget «Scoula Scuol+». La partecipaziun d’eira 24,1 pertschient.

«Uossa as poja proseguir cul proget»

Christian Fanzun, il capo da Scuol, es satisfat dal resultat: «Cun quist schi dvainta il credit da planisaziun per 500 000 francs valabel, uossa as poja cumanzar a planisar il proget Scoula Scuol+.» El es persvas cha quai saja la dretta via. Sco cha’l capo cumünal declera ston ils edifizis existents da la scoula inamöd gnir sanats per var 15 milliuns francs. «Uossa invezza as poja realisar quellas sanaziuns e schoglier eir amo la problematica da la mancanza da localitats da scoula e scoulina qua pro no», disch Christian Fanzun.

Text: Flurin Andry/fmr