Uffants in contact cun naiv e glatsch

Quai chi d’eiran plü bod las eivnas da sport, sun hoz ils progets da naiv e glatsch. Las scoulas da l’Engiadina Bassa van cun lur scolarinas e cun lur scolarins culs skis, a passlung, culs patins, culla schlitra o dafatta a giovar a tschoccas. Uschè imprendan ils uffants a cugnuoscher las differentas sportas d’inviern e minchün chatta qualchosa per seis gust. Cha quist’eivna dal proget naiv e glatsch ha lö dürant l’ultim’eivna da schner, ha da chefar eir cull’andamaint turistic: Las scoulas vegnan nempe invidadas dürant la foura da schner a visitar ils territoris da skis, e na in favrer cur chi cumainzan giò la Bassa las vacanzas da sport ed il travasch turistic in Engiadina es plü grond. 

Differentas sportas da naiv e glatsch

In mardi passà es statta la scoula primara e la scoulina da Ftan giò Sur En da Sent, ingio chi’s concentreschan differentas sportas da naiv e glatsch. Üna trentina da scolarinas e scolarins han giovà a tschoccas sül glatsch ed han fat oters gös illa naiv. In differentas gruppas sun ils uffants chaminats tras ün labirint sün ün prà tanter la loipa da passlung e l’En o han surgni invista, respectivamaing ün’introducziun i’l gö da tschoccas. E pels plü pitschens ba-staiva per part ün mantun naiv ed üna palla per as tratgnair. Tanteraint han els fat marenda in cumpagnia e simplamaing giodü l’atmosfera a Sur En, apunta da tschella vart da l’En. 

Provar sia furtüna

Claudio Puorger, chi’d es respunsabel pel glatsch e pel gö da tschoccas a Sur En, ha muossà pazienza culla brajada d’uffants e minchün ha pudü provar sia furtüna. Davo pac mumaint han las gruppas da prüma fin terza e da quarta fin sesavla classa pudü giovar ün gö in concurrenza e quella gruppa chi rablaiva lur tschoccas il plü dastrusch al puck nair dimmez la chasa da trais sün ses meters surgniva ils puncts. Las reglas dal gö da tschoccas sun sumgliaintas al gö da boccia. Cun stumplar culla tschocca il puckin as poja müdar il center da gö, scha’l puck banduna la chasa tuorna’l darcheu immez. Per üna jada han las mattas gnü daplü furtüna ed eir daplü sentimaint cullas plattas sveltas chi vegnan scrauvgiadas vi da las tschoccas e chi sun la basa per cha las tschoccas sglischan plü svelt o plü plan sül glatsch. 

Muossar ils talents

Intant cha’ls uffants gronds giovaivan per l’onur tanter mattas e mats, han ils uffants da scoulina pudü imprender a cugnuoscher quist sport cun tschoccas plü pitschnas ed adattadas per uffants pitschens. Eir quia s’han muossats bainsvelt ils talents da tschertüns chi vessan il plü gugent tut a chasa la tschocca. 

Il program da la scoulina e la scoula primara da Ftan da quist’eivna pel proget naiv e glatsch es stat fich vast. In marcurdi sun ils uffants da Ftan its culla schlitra ed in gövgia suna its culs skis. La scoula da Ftan nun es neir statta l’unica scoula chi’d ha imprais a cugnuoscher quist’eivna il gö da tschoccas a Sur En. In lündeschdi sun nempe stats ils uffants dad Ardez a Sur En ed in gövgia han profità dafatta las scolaras ed ils scolars da Zernez da la sporta attractiva a Sur En da Sent. 

Text e fotografias: Nicolo Bass