Noviteds dal cussagl cumünel da Zuoz – avuost 2025

In sias ultimas tschantedas ho il cussagl cumünel traunter oter tratto e decis sur dal seguaint:

Our dal motiv cha patrunas e patruns da fabrica dumandan la vschinauncha per persunas da l’art chi surpiglian cussagliaziuns da fabrica, ho il cussagl cumünel elavuro üna glista da candidatas e candidats chi sun pronts da surpiglier quista carica. Il cussagl cumünel conferma a sar Renato Maurizio, sar Reto Maurizio e sar Christoph Sauter scu persunas da l’art. La glista e las datas da contact da quistas persunas as chatta sülla pagina d’internet da la vschinauncha da Zuoz. Patrunas e patruns da fabrica haun inavaunt la pussibilited da preschanter egnas candidatas e candidats, cha’l cussagl cumünel ho da confermer.

 

Zieva cha la consultaziun publica ho gieu lö d’utuon 2024 ho la cumischiun da planisaziun piglio a maun las lavuors per respuonder las numerusas entredas. Las respostas sun gnidas valütedas e discutedas i’l cussagl cumünel chi ho finelmaing delibero las respostas individuelas a maun da mincha partecipanta e mincha partecipant da la consultaziun publica. Intaunt sun entros duos müdamaints chi pertuochan la revisiun da la planisaziun dal lö. Il cussagl cumünel piglia a cugnuschentscha ils svilups in Survih e sül Castell ed es unanimamaing perinclet da seguir a la dumanda da la cumischiun da planisaziun, da piglier sü ils svilups illa revisiun actuela. Que ho la consequenza cha’ls müdamaints haun da passer ün’examinaziun preliminera tar l’uffizi chantunel e dunque eir üna consultaziun publica. Quista seguonda consultaziun as dedichescha però unicamaing als svilups manzunos, e na a tuot la revisiun. La seguonda consultaziun publica ho lö d’utuon 2025, cur cha l’examinaziun preliminera es passeda.

 

Sur bgers ans as ho la signalisaziun sviluppeda e diversas situaziuns da trafic e da signalisaziuns correspundentas nu’s cunfaun pü cullas ledschas in vigur. Insembel culla polizia chantunela as ho piglio sü tuot la signalisaziun a reguard trafic in ed intuorn la vschinauncha da Zuoz. Il resultat cumplessiv es documento cun fotografias, cartas, las singulas sfidas e propostas per schoglier mincha singul punct. Las signalisaziuns sun categorisedas in:

 

·         signalisaziun da sveltezza

·         guidamaint dal trafic da camiuns

·         vias cun sens unic

·         scumands da trafic

·         adattamaints generels da signalisaziun

·         signalisaziun da vias champestras

·         signalisaziuns temporaras düraunt il temp da gestiun dals runels

·         scumands da parker

·         parkegis permiss

·         signalisaziuns chi vegnan regledas pü tard causa fabricas

Cun pochs puncts da sclarimaint ed adattamaints decida il cussagl cumünel unanimamaing da cuntinuer cul proget e dad inoltrer la dumanda al uffizi per tecnica trafic, per decreter.

 

Zieva divers sclarimaints e numerusas imsüraziuns a reguard üna renovaziun da l’indriz dals sains i’l clucher San Luzi ho il cussagl cumünel pudieu deliberer il proget cumplessiv chi’d es previs il preventiv 2025 cun CHF 250‘000 e chi vain realiso da la ditta Muff Kirchturmtechnik AG. Las lavuors vegnan realisedas illa seguonda mited dal 2025.

Üna cunvegna da prestaziun traunter las vschinaunchas commembras e la societed Engiadina Plaiv Turissem es üna consequenza our da las discussiuns a reguard dovairs e respunsabiliteds da las vschinaunchas in connex culla societed Engiadina Plaiv Turissem (EPT). Oriund es la EPT gnida fundeda per separer la politica da la gestiun turistica. L’intenziun d’eira cha, la capacited turistica vain independenta da la gestiun politica, però restan las vschinaunchas ils purteders finanziels da la societed, da la gestiun turistica. Las lezchas da la EPT sun gnidas statuidas in sieus statüts e la gestiun da la EPT es gnida incumbenzeda a la Engadin Tourismus AG. In divers discuors düraunt l’utuon 2024 es la politica gnida a la conclusiun cha que drouva üna cunvegna da prestaziun per definir las prestaziuns da la EPT scu eir ils drets ed ils dovairs da las vschinaunchas scu pusteders. Il cussagl cumünel deliberescha la cunvegna da prestaziun a maun da la radunanza cumünela.

Zieva cha San Murezzan es sortieu da la destinaziun turistica da l’Engiadin’Ota nun exista pü üngüna fuorma cumünaivla da finanziaziun dad evenimaint. Ils uschedits „Diamond Events“ sun crudos davent ed organisatuors haun da dumander a mincha vschinauncha singula per sustegn finanziel. La nouva destinaziun Engadin Tourismus AG ho piglio a maun l’elavuraziun d‘ün sistem cumünaivel da finanziaziun sur tuot las vschinaunchas, inclusiv San Murezzan. Üna proposta es gnida inoltreda e gnida valüteda da la Engiadina Plaiv Turissem a maun dals cussagls cumünels. La valütaziun da la EPT es positiva suot diversas resalvas e premissas. Quistas vegnan comunichedas a la Engadin Tourismus AG.

 

Il comitè d’organisaziun da La Diagonela ho inoltro üna dumanda da sustegn per la realisaziun da las cuorsas dal 2027 fin 2029. La dumanda cumpiglia prestaziuns da la vschinauncha da Zuoz in connex culla preparaziun da loipas e naiv artificiela, cuosts per trafic e sgürezza, localiteds e Plaz per l’arriv da las cuorsas. Il sustegn finanziel supplementer es reglo sur la societed Engiadina Plaiv Turissem. Il cussagl cumünel decida da sustgnair La Diagonela eir pels ans 2027 fin 2029.

In Engiadin’Ota sun instradedas lavuors per implementer üna strategia cumünaivla per la promoziun da la scolaziun tampriva. Per amegldrer e coordiner las spüertas, per optimer la comunicaziun, las colliaziuns e la gestiun dess gnir s-chaffida üna plazza regiunela da coordinaziun. Il cussagl cumünel da Zuoz es pront da’s parteciper vi dals cuosts annuels da totel CHF 70‘000. Dalum ch’üna cunvegna da prestaziun es avaunt maun, po quist affer gnir tratto i’l ravuogl dal cussagl cumünel.