Chalandamarz cun tun e füm

Üna bellezza a verer co cha las mattas ed ils mats schloppan la giaischla. Sco ün sot ritmic elegant as stordschan ellas ed els a dretta ed a schnestra e la giaischla schloppa aint il tact. E chi chi fa quai il plü bain, vain per exaimpel a Scuol dafatta premià. La concurrenza da schloppar la giaischla a Scuol ha gronda tradiziun. Eir a Zernez as giaiva amo da meis temp a la fin dal cortegi in chasa da scoula a schloppar la giaischla. Il piertan tanter l’aula e la sala da gimnastica d’eira uschè pitschen, cha minchatant struschaiva il schnipper la paraid. Quai daiva schlops in uorden – i’m para da tils dudir amo hoz illas uraglias...

Eu nu n’ha mai savü schloppar inandret la giaischla. Pro mai funcziunaiva quai be dad üna vart e sainza melodia eleganta. Davo cha vaiva surgni üna jada il schnipper intuorn las uraglias, am d’eira passada la vöglia d’exercitar. Ma per furtüna d’eir eu il plü vegl da la classa. Uschè cha mia rolla d’eira quella dal patrun e dirigent. Quista rolla am staiva bler plü bain: Culla cigarra storta in bocca e culla bachetta in man faiva bler daplü parada davant il cor da Chalandamarz. Quista rolla n’haja gnü fingià in sesavla classa aint in Brail e lura natüralmaing in novavla a Zernez e Brail. Schloppar la giaischla pudaivan ils pasters a tuot pudair. 

Intant cha quels exercitaivan fingià ün mais ouravant, pudaiv eu am concentrar sül impizzar la püppa e dar fö las cigarras cha vaivan cumprà in grondas quantitats pro duonna Leonora. Eu n’ha l’impreschiun, ch’ella rablaiva avant Chalandamarz davent tuot il tabac chi’s vaiva stagiunà dürant l’on. Ed eir il fümar il cigarillo staiv’esser exercità ouravant. Sco tuot las tradiziuns vaina natüralmaing mantgnü quella vouta eir quista e quai fin cha’l füm gniva our per las uraglias. 

Columna: Nicolo Bass