Crajer voul dir na savair

Quantas jadas al di as doda cha qualchün disch: "Eu pens… " o "eu crai cha quai saja uschè". Eir svess dovraina quists pleds adüna darcheu. "Eu crai cha la butia saja serrada". Vairamaing nu voul quai dir oter co chi nu's sa scha quai es propcha uschè. Crajer voul perquai dir na savair. Per evitar da dir qualchosa chi nu's sa, as poja sviar oura cun simplamaing crajer cha quai saja uschè. O dit oter: Cun crajer as poja sviar la vardà. 

L'intelligenza artificiala nu craja mai. Quella chatta cun persvasiun üna resposta sün mincha dumonda. Quai es bod fingià ün pa arrogant da crajer da savair tuot. Eir scha las infuormaziuns nu correspuondan finalmaing a la vardà. 

Sco schurnalists eschan nus sensibilisats - be da crajer nu basta a nus. Perquai eschna in dovair da verifichar las deposiziuns - il meglder dafatta duos jadas - e da nomnar las funtanas. Be uschè pudaina far üna lavur seriusa e credibla. Tantüna eschan nus obliats a la vardà. Excepziuns daja forsa be als 1. avrigl, o lura a Pasqua o pro istorgias sur dal Niculaus. Malavita nu vezzan quai però tuot las medias uschè e suvent vain preschantada be üna vardà. Quai fa mal e disfama la vocaziun da schurnalist. 

Da pudair lavurar in Engiadina sco schurnalist es ün privilegi. Chi's cugnuoscha sco Engiadinais a bod tuot la glieud, nun es adüna il plü simpel. Impustüt brich cur chi va per retscherchar ün tema plü spinus. Tant plü important esa da far la lavur seriusamaing. Quai vain eir stimà da las lecturas e dals lecturs. 

Dal rest tschercha la redacziun da la Engadiner Post/Posta Ladina üna nouva procudenta o ün nouv producent cun respunsabiltà online per d'utuon. Scha Vais paschiun pel schurnalissem e per l'Engiadina es quist il dret mumaint.