Ils Engiadinais han tschüf fö!

Quist’eivna m’ha dit ün Tiroler, ch’el haja d’inrar passantà qualchosa simil in Engiadina. Ch’üna tenda plaina cun Engiadinaisas ed Engiadinais chi van sün maisa e sotan, splattan, chantan e güvlan, nu saja pussibel pro els our il Tirol. 
Quai nu possa bod na crajer. Plü bod – da meis temp da giuventüna – as stuvaiva ir giò pel Tirol per passantar bellas festas cun üna tenda chi arda da la bun’atmosfera. Nossa glieud sezzaiva pro similas festas plütost culla biera in man vi da la maisa e d’inrar ch’inchün gniva our da la pel. Quai conferma eir il Tirolais: Ch’el saja stat üna jada avant vainch ons ad üna festa da god in Engiadina e cha quai saja stat sul lungurus. 
Ma in sonda passada nun ha’l cret quai ch’el ha vis: Tuot la glieud – e quai giuvens e vegls aint pel davomezdi o la saira tard – han tschüf fö da l’atmosfera al Festival dals Nanins a Scuol ed ingün nun es plü restà tachà vi dal banc. Che cundiziun! E che plaschair! Simplamaing impreschiunant da verer co cha tuot la glieud preschainta ha giodü l’atmosfera. E quai cun marchas e polcas e blera musica da tola, s’inclegia. Sainza grondas aspettativas. Sco scha las Engiadinaisas ed ils Engiadinais vessan gnü dabsögn d’üna bella festa per as laschar ir darcheu üna jada e per invlidar ün mumaint ils pissers dal minchadi e las catastrofas sün tuot il muond. Quai ha fascinà eir al Tiroler. El tuorness gugent amo üna vouta. Perquai saraja da repeter insacura quist evenimaint – forsa in duos ons?
Intant giodaina las algordanzas, almain quels chi nun han pers dal tuot la memoria. Plü bod as stuvaiva in quist cas dumondar als collegas che chi’d es capità. Hoz daja per furtüna las medias socialas chi quintan las aventüras. Uschè vezzaran eir quels sur cunfin sco cha’ls Engiadinais san festagiar.

Columna: Nicolo Bass