I’l pajais da las 1000 islas

Pella prüma jada n’haja fat d’incuort vacanzas in Croazia. Eu sun stat fich surprais da la bellezza da quist pajais cun sias citads tradiziunalas, la natüra multifaria e l’aua clera e netta. Quai chi m’ha fascinà fich ferm es la varietà natürala a la riva dal mar. Quella es bainschi crappusa. Ma invezza da be verer süll’aua vers l’orizont dal mar, as vezza da la vart dretta dal mar adriatic bleras e multifarias islas a crescher our da l’aua. Na per nüglia nu vain la Croazia eir nomnada il pajais da las 1000 islas. 
Plaschü fich bain ha tanter oter eir la cità da Rovinj: Giassinas e giassettas traversan la part veglia e tuottas paran da finir precis davant la baselgia chi survaglia süsom il muot tuot la baja. E sül tramunt dal sulai s’implischan tuot las giassas cun millis e millis da turists...
I para ch’eu nu sun l’unic chi s’ha laschà fascinar da quista cuntrada. Sco cha’l «Blick» ha scrit quist’eivna es la riva adriatica croata sün plazza quatter a reguard l’affluenza da giasts. Da l’Istria fin Dalmazia vegnan dombrats 67 giasts per ün indigen/insulan. Quai sun dafatta desch pernottaziuns daplü per abitant co a Mallorca (tschinchavla plazza). Quista rangaziun guadogna la Grecia cun distanza: Santorin, Mykonos e Rhodos (Ägais) dombran 117 pernottaziuns per insulan e Corfu cullas islas ionicas 98 giasts per abitant. Ed uossa la gronda surpraisa sün plazza trais: il Tirol dal Süd ha 68 pernottaziuns (dafatta üna daplü co in Croazia) per mincha abitant. Ed il Tirol dal Nord ragiundscha tuottavia la settavla plazza cun 50 pernottaziuns. Quai sun las unicas destinaziuns sainza mar illa rangaziun Top 10. Forsa han tuottas duos la Svizra sco mar impli cun munaida chi maina turists e creaziun da valur a la riva tirolaisa?

Columna: Nicolo Bass