Plaschair per piculezzas

In november n’haja visità il prüm concert da la fuormaziun «Egerländer Musikanten» cul nouv dirigent Alexander Wurz a Minca. Quista fuormaziun fundada dal cuntschaint Ernst Mosch festagia quist on il giubileum da 70 ons. Il nouv dirigent es pür la terza persuna chi das-cha diriger quista fuormaziun. 
Il concert es stat perfet. Meis videos illas medias socialas sun gnüts guardats fin 84 000 jadas. Tscherts tamberlans han commentà sün Facebook, cha’l dirigent siglia intuorn massa ferm sül palc e nu saja degn al grond «Ernst Mosch», oters schiloners s’agitaivan cha la musica saja o massa moderna o massa tradiziunala... Blers commentars plain ödi n’haja simplamaing stüz. 
Quist’eivna n’haja pudü sunar cun üna fuormaziun pitschna per üna duonnina da Sent chi’d ha accumpli seis 99avel anniversari illa chüra da Scuol. Adonta ch’ella sezzaiva illa sopcha da roudas, es ella statta sü e sotaiva cun seis confamiliars. Seis ögls glüschivan, ella riaiva e splattaiva ils mans dal plaschair, eir scha la musica nu d’eira perfetta. 
A mai muossa quai, cha la dretta vita capita dadour las medias socialas e cha perfecziun nun es importanta. Quai chi quinta es la paschiun ed il plaschair per piculezzas chi laschan invlidar per ün mumaint tuot quai chi capita sün quist muond our d’squader.