Mütscha!

Cun l’apparat da fotografias in man e bain posiziunà spet eu a gnir al vendschader da la cuorsa tras il böt. Guardond tras la marella vezza la rampa da lain davant mai. Id es ferm fraid e bletsch. Il böt es precis süsom la rampa glischa sco savun. Ün dals prossems vess dad esser il nouv champiun svizzer da mountainbike. La situaziun vain adüna plü privlusa. Ün sportist sglischa cun seis bike precis sülla rampa e crouda intuorn. El resta per terra e sbraja dal mal. «Mütscha!», pens eu dapermai. Eu stögl nempe fotografar il vendschader! 
Plü tard vezza süllas fotografias cha quist partecipant vaiva üna ruottadüra dal s-chain da la chomma ed is vezzaiva l’oss sur il pè. Pac plü tard es la cuorsa intuorn il Parc Naziunal Svizzer gnüda interruota. Sül Pass da Chaschauna navaiva a tuot pudair, las partecipantas ed ils partecipants han chattà ricover in stabilimaints publics e chasas privatas e sun lura gnüts ramassats dapertuot intuorn. Vers saira n’haja lura fat üna fotografia da la nouva champiunessa svizra Milena Landtwing pro tschêl serain e cler dal sulai. Quai es stat il bikemaraton bluord dal 2011. 
Hoz ha lö fingià la 25avla ediziun da quista cuorsa intuorn il Parc Naziunal Svizzer. Ed a bleras ediziuns suna stat preschaint sco schurnalist e fotograf. Uschè cha da quintar dessa amo bleras aventüras ed istorginas. Per exaimpel eir quella dal EP-Team pro la 13avla ediziun dal 2014. Ses persunas as vaivan annunzchadas per quista squadra e sun gnüdas accumpagnadas da la «Engadiner Post/Posta Ladina» dürant il temp da preparaziun. Tanter quellas eir Monika Kamm chi vaiva surgni ün bike sco regal da nozzas e nu vaiva mai dovrà quel. Per quist proget til vaiv’la tut la prüma jada our da schler e güsta guadognà la cuorsa da S-chanf fin Scuol cun ün nouv record. 

Text e fotografia: Nicolo Bass