Üna fin d’eivna suot l’insaina dal chaunt
A Zuoz es gnida preschanteda l’ideja dal «Inscunter da chaunt». Tenor comunicaziun as tratta tar quist inscunter dad ün nouv format culturel chi ho l’intent da metter a disposiziun mincha duos ans üna plattafuorma per furmaziuns e preschantaziuns, per s’approfundir in tematicas dal chaunt.
Curdin Lansel (a dretta) e Martin Camichel co-organiseschan la prüma ediziun dal «Inscunter da chaunt a Zuoz» chi saregia dals 13 als 15 da settember (fotografia: mad).
Il «Inscunter da chaunt a Zuoz» prevezza düraunt üna fin d’eivna diversas spüertas per as parteciper ed as perfecziuner, saja per dirigentas, chantaduors, amatuors dal chaunt, glieud indigena e glieud d’utrò. L’intera spüerta es gratuita, scu cha’ls organisatuors scrivan illa comunicaziun.
Il program dal prüm «Inscunter da chaunt a Zuoz» es già pront. Dals 13 als 15 da settember vegnan spüerts concerts, referats, lavuratoris, barats e scolaziuns. Tenor l’organisaziun – chi vain presidieda da Curdin Lansel e sustgnida da Martin Camichel – saja que sto pussibel d’ingascher eir persunaliteds da reputaziun internaziunela pels differents puncts da program. (cdm/fmr)
Per parteciper a l’occurrenza fo que dabsögn da s’annunzcher. Ils detagls as chatta sün:
singtage-zuoz.ch
FMR
La FMR (Fundaziun Medias Rumantschas) furnischa cuntegns medials scrits (per exaimpel texts e graficas) e fotografias per mans da las medias rumantschas. Ella scriva seis artichels in tuot ils tschinch idioms ed in rumantsch grischun. La FMR incumbenzescha eir a persunas rumantschas dastrusch e lontan da scriver columnas sur da quai chi tils occupa illa vita da minchadi.
Diskutieren Sie mit
anmelden, um Kommentar zu schreiben