Ressort La Sassa nu va a Losanna

«Eu sun fich cuntainta. Per nus es quai ün grond highlight ed ün grond pass inavant davo blers ons discussiuns», disch Gabriella Binkert Becchetti, la presidenta cumünala da Val Müstair. Ma in connex cun la pendiculara saja amo pendent ün ulteriur recuors pro l’Uffizi federal da trafic.
Becchetti es eir la pledadra dals investurs dal proget turistic La Sassa – nempe la ditta d’architectura e d’immobiglias Domenig da Cuoira – chi voul investir a Tschierv var 30 milliuns francs. Quel proget prevezza ün ressort da vacanzas cun passa 200 lets illa fracziun da Tschierv – quai a l’entrada dal cumün da la vart dal Pass dal Fuorn – üna pendiculara dad ot da Tschierv fin i’l territori da skis Minschuns sco eir ün proget d’innaiver la pista da Minschuns a Tschierv.

Refüsà recuors parzialmaing
Per quist proget cun grond potenzial turistic per la Val Müstair vaiva la populaziun eir dat glüm verda cun acceptar üna revisiun parziala da la planisaziun locala l’on 2018. E cun quista decisiun vaivan las votantas ed ils votants dal Cumün da Val Müstair lura eir s-chaffi las premissas illa planisaziun d’ütilisaziun per quist intent. Eir la Regenza grischuna vaiva approvà la fin dal 2019 la revisiun parziala da la planisaziun locala.
Ma cunter quista decisiun han las organisaziuns per la protecziun da l’ambiaint, nempe la Fundaziun svizra per la protecziun da la cuntrada e «Mountain Wilderness», fat recuors pro l’anteriur Güdisch administrativ dal chantun Grischun (hoz il Güdisch superiur dal chantun Grischun). La fin da marz vaiva il Güdisch superiur dal chantun Grischun lura refüsà quist recuors parzialmaing. Approvà vaiva el be il recuors cunter üna plazza da parcar planisada cun var 130 plazzas da parcar chi vess gnü per consequenza la runcada da totalmaing 457 meters quadrats god. Il Güdisch superiur dal Grischun vaiva constatà cha quist intent nu saja confuorm a la ledscha da god.

Ledscha nu vain tgnüda aint
«Nus vain analisà la situaziun dürant ils ultims 30 dis insembel cun nos advocat ed eschan gnüts a la conclusiun cha nus nu vulain trar inavant la chosa davant Güdisch federal», disch Franziska Grossenbacher, co-mainagestiun da la Fundaziun svizra per la protecziun da la cuntrada. Ella agiundscha cha quai saja stat important per els da demuossar cha la ledscha nu gnia tgnüda aint in connex cun la runcada dal god pel parcadi. E quai haja a la fin eir confermà il güdisch cun sia decisiun la fin marz d‘ingon. Eir la seguonda recurrenta – l’organisaziun «Mountain Wilderness» – ha confermà in scrit invers la FMR da nu vulair trar inavant il recuors a Losanna.

Sentenza dal güdisch na amo in vigur
Quai voul dir cha’l ressort da vacanzas cun 200 lets sco eir il proget d’innaiver la pista da Minschuns a Tschierv han surgni glüm verda e pon gnir fabrichats. «Ma causa chi sun amo stattas las vacanzas da Pasqua es gnü prolungà il termin fin cha la sentenza dal güdisch es in vigur legala. Quai vess lura dad esser il cas als 9 mai», declera Gabriella Binkert Becchetti.
La presidenta cumünala da Val Müstair accentuescha chi s’haja pudü fabrichar sü dürant tuot quists ons da discussiun üna basa da fiduzcha cun las organisaziun per la protecziun da l’ambiaint – e quai eir cun demuossar divers progets jauers a favur da la natüra, sco per exaimpel la revitalisaziun dal Rom. «Quai es eir statta üna buna basa da discussiun», disch Gabriella Binkert Becchetti.

Ulteriuras infuormaziuns suot: www.lasassa.ch

Autur: Martin Camichel/fmr