Paulin Nuotclà es naschü a Ftan Baraigla. Üna segunda staziun da si'infanzia es statta a Preda. Plü tard es la famiglia Nuotclà lura ida a star a Samedan, ingio cha Paulin Nuotclà ha lura eir frequentà la scoula. In seguit ha el fat la scoula d'art a Basilea ed el s'ha occupà culla lingua rumantscha in differentas spartas, tanter oter cun scriver texts per sias chanzuns. Paulin Nuotclà vala sco pionier dal rock rumantsch. Chanzuns sco «Engiadina» o «Il prüm milliun» sun classikers da la Rumantschia cha minchün cugnuoscha. Dal 1976 fin dal 1989 ha Paulin Nuotclà creà mincha mais ün comic, quists cudaschets sun svelt dvantats cult pro grond e pitschen. 

Paulin Nuotclà toccaiva pro las vuschs marcantas da la scena da chantauturs rumantschs. In sias chanzuns ha el cumbinà texts poetics cun melodias captivantas, fat palpablas istorgias persunalas, sco eir express critica invers la società. Sia musica es fermamaing inragischada illa lingua e cultura rumantscha e quai sainza perder l'actualità. Cun sia mort perda la scena culturala rumantscha üna vusch marcanta ed ün artist multifar. (rtr/pl)