L’implant chi vain gestiunà da la Uina SA ha tenor la suprastanza cumünala da Scuol explotà las reservas da material sül lö. La cuntinuaziun da la gestiun a Parnarsura es colliada cun divers dischavantags, perquai cha’l material per la producziun da glera e beton sto gnir transportà nan sur lungas distanzas e chaschuna uschea cuosts, trafic e contaminaziun da l’ambiaint evitabla, sco cha la suprastanza cumünala scriva i’l protocol. Cha perquai saja da metter in dumonda principialmaing quel lö per la gestiun d’ün implant da glera e beton.

Il cumün da Scuol prevezza perquai da tscherchar ün lö plü perdüraivel per la producziun dals materials da fabrica – e d’examinar sinergias cun oters progets, concretamaing cul spostamaint da la sarinera da Scuol chi sarà necessari i’ls prossems ons.

Quist müdamaint pretenda però üna revisiun parziala dal plan directiv per l’explotaziun e l’ütilisaziun dal material e la gestiun d’immundizchas, sco cha la suprastanza scriva inavant. Quella voul il cumün uossa dumandar pro la Regiun Engiadina Bassa/Val Müstair per pudair cuntinuar cun l’intent da spostar l’implant da glera. (cdm/fmr)

FMR

La FMR (Fundaziun Medias Rumantschas) furnischa cuntegns medials scrits (per exaimpel texts e graficas) e fotografias per mans da las medias rumantschas. Ella scriva seis artichels in tuot ils tschinch idioms ed in rumantsch grischun. La FMR incumbenzescha eir a persunas rumantschas dastrusch e lontan da scriver columnas sur da quai chi tils occupa illa vita da minchadi.