Markus Solinger es entrà in uffizi sco secretari general als 8 avuost 2023. In stretta collavuraziun culla suprastanza, la direcziun ed il team da la Lia Rumantscha ha'l contribui fermamaing a l'elavuraziun da la nouva orientaziun strategica da l'organisaziun. Però in vista ad imaginaziuns divergentas co realisar la strategia e co cuntinuar a sviluppar l'organisaziun vain l'ingaschamaint da Markus Solinger terminà.

Dürant seis temp d'uffizi sun gnüdas s-chaffidas basas importantas per l'orientaziun futura da la Lia Rumantscha. Ün accent special da sia actività es stat il rinforzamaint da las prestaziuns da basa i'ls
secturs da la lingua e da la fuormaziun. Ultra da quai ha Markus Solinger fat avanzar decisivamaing la transfuormaziun digitala da l'organisaziun. Uschè ha la Lia Rumantscha publichà l'on passà sia strategia per la transfuormaziun digitala. Tenor la comunicaziun a las medias pussibiltescha quella üna collavuraziun structurada da tuot las instituziuns chi s'ingaschan i'l sectur digital per la lingua rumantscha.

La suprastanza suot il presidi dad Urezza Famos ingrazcha a Markus Solinger per seis grond ingaschamaint e til giavüscha tuot il bun per seis prossems pass professiunals. El bandunarà l’organisaziun ils prossems dis. Cha davo las ultimas surdattas surpiglia la direcziun la respunsabiltà pels affars operativs, scriva la Lia Rumantscha. 

Comunicaziun da pressa Lia Rumantscha