Per exaimpel las musicas da Silvaplauna, Zernez, Samedan, S-chanf, Susch e la Musica da giuvenils La Plaiv-Zernez. Ma a nu d’eira be da udir musica da tola, dimpersè eir tuns pü sonors dal Cor dal Parc Naziunel e dal Jodlerchörli da l’Engiadin’Ota. Buns giavüschs haun purto il president da l’Uniun da musica chantunela Andy Kolleger ed ils duos presidents cumünels, Gian Andrea Bott da S-chanf e Domenic Toutsch da Zernez. Tuots duos haun il dret vi da la mited da la musica: la Societed da musica Cinuos-chel/Brail es nempe l’unica musica in Engiadina chi collia duos vschinaunchas politicas. Cinuos-chel es nempe üna fracziun da S-chanf e Brail üna fracziun da Zernez. Fingià aunz 150 ans d’eira la musica gnida fundeda scu «Societed da musica da las aclas». Ma la Musica da Cinuos-chel/Brail collia eir l’Engiadina Bassa cun l’Engiadin’Ota e forsa dafatta eir ün pô il vallader cul puter. In mincha cas cha la Punt Ota traunter Cinuos-chel e Brail es il meglder simbol per quista colliaziun. Quista punt es eir steda preschainta sül regal per quatter musicants chi haun furmo la Societed da musica Cinuos-chel/Brail sur decennis ed haun vivieu la cumpagnia. Cun grand applaus sun els gnieus tschernieus scu commembers d’onur da la societed: Nuot Godly es daspö 53 ans musicant e commember da la societed, Reto Juon e Hans Graf daspö 52 ans e Gian Peider Albin daspö 37 ans. Trais dad els haun festagio già il giubileum da 100 ans Societed da musica Cinuos-chel/Brail dal 1976 i’l ravuogl da la musica. Ün regalin ho que do dal District da musica I eir per il president da la societed da musica Curdin Graf. In seguit als discuors haun las 22 musicantas e musicants musso musicalmaing cha lur societed es tuot oter cu veglia e cun duos giuvnas dirigentas suppleantas es eir l’avegnir da la musica garantieu. Per trategnimaint fin aint per la not haun a la fin pissero ils musicants da Sargans e la furmaziun Bergland Power.  

Text, fotografia e video: Nicolo Bass