Arina ha ündesch ons ed ella es statta da la partida pella prüma jada al Bike-Maraton dal Parc Naziunal. Christoffel ha 81 ons e s’ha partecipà pella terza jada a la cuorsa. Tuots duos vaivan tschernü il traget Putèr da S-chanf a Scuol. E tuots duos paraivan in sonda mezdi aint il böt dad esser amo fits. Là d’eiran radunats amo ulteriurs confamigliars dad Arina chi vaivan tut part a l’ediziun da giubileum dal Bike-Maraton: Arnold (65), Mario (46), Susanna (37) e Laurynne (16 ons) chi’d es perfin dvantada seguonda da sia categoria. «Id es bel da far part al Bike-Maraton, da S-chanf fin a Zernez suna i cun fö da la foragio», ha quintà «barba Christoffel», sco cha seis confamigliars til nomnan. El rapreschainta la quarta generaziun da la famiglia Denoth. Üna jada saja bainschi crodada oura la chadaina, mo quella haja’l simplamaing darcheu miss aint, ha quintà Christoffel. Ed a Guarda haja’l dit a seis cuntschaints da stumplar ün zich», ha’l agiunt riond. Susanna ha fat pella 21avla jada il Bike-Maraton ed es rivada pella 20avla jada aint il böt. Cun excepziun dal nouv traget davent da Zernez haja ella fat fingià tuot las etappas da la cuorsa. «Il Bike-Maraton tocca simplamaing pro, quai es sco il highlight da la stà», ha’la dit. Arnold Denoth ha manià: «A mai plascha la dinamica da quista cuorsa. Dad ir cul velo cunter seis agen temp, quai am plascha». Pel resultat nu giaja a la fin finala gnanca.