Revisiun totela da la planisaziun dal lö
Scu dumando periodicamaing ho mincha vschinauncha da piglier a maun üna revisiun totela da la planisaziun dal lö. La cumischiun da planisaziun, insembel cul büro da planisaziun STW AG da Cuira, ho piglio a maun las lavuors per adatter la ledscha cumünela da fabrica e la planisaziun dal lö a las circumstanzas actuelas, las ledschas superiuras e per esser pronto pel futur. La revisiun totela es sül stedi dad ün’examinaziun preliminera tals uffizis chantunels.
Sur elavuraziun da la constituziun cumünela
Zieva arduond 10 ans daspö l’ultima revisiun da la constituziun cumünela es darcho cò il dovair da surlavurer la constituziun cumünela. Il cussagl cumünel ho incumbenzo üna gruppa da lavur culla lezcha da fer üna proposta adatteda a las pretaisas actuelas.
Sur elavuraziun ledscha taxas da giasts / promoziun turistica
L’administraziun cumünela constatescha cha la ledscha in vigur nu’s cunfo pü culla pratcha e ch‘üna sur elavuraziun fo dabsögn. Il cussagl cumünel incumbenzescha üna gruppa da lavur per preparer üna proposta a maun dal cussagl cumünel.
Revisiun da l’uorden da Chalandamarz
La cumischiun da Chalandamarz ho piglio a maun la sur elavuraziun da l’uorden da Chalandamarz cul böt dad adatter quist al temp dad hozindi e per resguarder svilups dals ultims ans. Üna proposta vain zieva il Chalandamarz 2022 preschanteda a la populaziun cul böt da metter in vigur üna nouva ledscha da Chalandamarz pel Chalandamarz 2023.
Sanaziun dal mür da sustegn vi da la via veglia Zuoz – Madulain
Il mür da sustegn vi da la part suot da la via veglia traunter Zuoz e Madulain es in ün stedi chi fo dabsögn dad imsüras. In dumanda vegnan duos variantas scu soluziun. Üna varianta prevezza da sustegner il mür existent cun üna scarpada, voul dir da sustegner il mür cun implir aint materiel. Quista varianta purtess cuosts dad arduond CHF 70‘000.00 e füss optic la soluziun da perseguiter. L’otra varianta, cun cuosts dad arduond CHF 150‘000.00 füss la sistematica „RÜGLEI“ cun cröchs ed üna rait da fier. L’avantag füss cha nu’s per tuocha culla fabrica tuot las parcellas privatas sper la via. Il cussagl cumünel decida unanimamaing da perseguiter la varianta 1 culla scarpada.
Spazi d’abiter per indigens
Eir il cussagl cumünel da Zuoz es confrunto culla situaziun actuela da maungel da spazi d’abiter per indigens. Quista as ho tres Corona müdeda. Per indigens es que ourdvart difficil da chatter abitaziuns per fitter in ün ram favuraivel u insomma da chatter spazi per viver. Aunz scu definir ün agir in chosa decida il cussagl cumünel da sclarir il dabsögn, saja que per abitaziuns da fitter, ma eir pussibiliteds da cumprer abitaziuns u terrain. A dess gnir fatta üna retschercha per definir il bsögn effectiv. Pür sülla basa dad ün purtret rapreschantativ chi permetta al cussagl cumünel da tratter la dumanda sün basa concreta, as po discuter eventuelas soluziuns.
Tschernas da Chalandamarz 2022
A las tschernas dals 1. marz 2022 sun seguaintas caricas in tscherna:
Cussagl cumünel: Successiun sar Romeo Cusini, reelecziun duonna Ladina Tarnuzzer
Cumischiun sindicatoria: Successiun sar Gian-Reto Rainalter
Cumischiun da fabrica: Reelecziun sar Marco Salzmann
Cussagl da Scoula: Successiun sar Roman Grossrieder
Radunanza cumünela per «livestream»
A la radunanza cumünela dals 16 favrer 2022 do que üna premiera. La radunanza vain transmissa per «livestream» e po gnir seguida dad a chesa. Il cussagl cumünel es interesso landervi, scha quista fuorma vain tratta a nüz. Il dret da vuscher resta tar votantas e votants preschaints in sela da gimnastica.
Rundella per la cruscheda Resgia
Zieva cha’l cussagl cumünel ho dumando da valüter la situaziun da la cruscheda Resgia da nouv ho l’uffizi chantunel invio üna uscheditta „Road Safety Inspection (RSI)“. Basand sülla RSI fo il chantun uossa la proposta da rimplazzer la cruscheda cun üna rundella. La discussiun i’l cussagl cumünel muossa avantags e dischavantags. Scu avantags, sper la diminuziun dal prievel, vegnan numnos: spazi per nouvs parkegis illa zona da misteraunza Curtinellas, la schanza dad ameliorier la situaziun pel trafic plaun sur la Via Dorta e la finanziaziun in ün ram pussibel dad arduond CHF 400‘000.00 per la vschinauncha. La problematica discuteda es la canera tres tuot ils ütiliseders da la via chantunela chi staun frener e darcho accelerer pervi da la rundella. L’uffizi chantunel elavurescha uossa ün proget concret per la realisaziun dal 2024.
Engiadina Plaiv Turissem
Daspö ils 1. schner 2022 es la gestiun da la spüerta turistica da Zuoz suot la bachetta da la nouva societed «Engiadina Plaiv Turissem». Las trais vschinaunchas da Zuoz, S-chanf e Madulain scu commembras da la societed, coordineschan e coopereschan sün quista via la spüerta e realisaziun da prodots turistics. Que in stretta collavuraziun culla destinatiziun Engadin St. Moritz AG (ESTM AG), chi’d es respunsabla per la comunicaziun e promoziun da la spüerta turistica
Structuras optimedas süls champs forestel e servezzan tecnic
Las vschinaunchas da Zuoz e S-chanf collavureschan daspö l’an 2013 süls champs forestel e servezzan tecnic. Düraunt l’an 2021 haun las duos vschinaunchas insembel cul uffizi chantunel da god e prievels da natüra piglio a maun ün analisa da la collavuraziun per ameliorer las structuras ed adatter la cunvegna da prestaziun a las pretaisas actuelas.
Lavuors forestelas
Düraunt l’an 2022 sun previsas differentas lavuors. Da manzuner sun duos tagls da laina pü grands, ün sün Il Nüd e ün sülla superficia «Bagn da l’uors», que’s tratta da god in possess da la vschinauncha da Zuoz sün terrain dad ün otra vschinauncha, in quist cas da la vschinauncha da S-chanf.
Infrastructura Center Sur En
Düraunt l’an 2021 es gnieu fabricho ferm il areal dal Center Sur En. La vschinauncha da Zuoz ho sano cumplettamaint l’infrastructura suot terra (differentas lingias dad ova, electricited, lingias da la Swisscom eui.). La Golf Engadin St. Moritz SA ho fabricho üna nouva garascha suot la terrassa dal Restorant SA chi spordscha plazza per carts da golf, ma eir per la maschina da loipas. Il svilup dal areal Sur En es fich allegraivel e conferma la funcziun da center pel futur. La spüerta turistica vain amelioreda sün basa da l’infrastructura. Que cuntinua eir culla prolungiaziun da la via da glatsch chi vo nouv da Zuoz fin Madulain.