Noviteds dal cussagl cumünel da Zuoz
In sias ultimas tschantedas ho il cussagl cumünel traunter oter tratto e decis sur dal seguaint:
Cussagl cumünel 2023/24Illa chanteda dals 5 lügl 2023 sun gnieus saramantos il nouv president cumünel sar Romeo Cusini ed ils nouv tschernieus cusgliers duonna Alexandra Blumenthal e sar Jachen Delnon. Scu vicepresidenta pel temp da legislatura 2023/24 tscherna il cussagl cumünel a duonna Ladina Tarnuzzer. Il nouv scumpart da decasteris guard’oura seguaintamaing:
Romeo Cusini: President cumünel, administraziun, persunel, sandet e provedimaint sociel, sgürezza publica
Jachen Delnon: Finanzas, economia publica
Lucian Schucan: Scoulas, cultura
Ladina Tarnuzzer: Turissem
Alexandra Blumenthal: Fabricas, planisaziun, ambiaint ed energia
Flurin Wieser: Trafic public, digitalisaziun, immundizchas, agricultura, alps, pasculs e gods
Cristian Ferrari: Vias, provedimaint d’ova, chanalisaziun, iglüminaziun, stabels cumünels
Cumischiuns e gruppas da lavurIl cussagl cumünel repassa tuot las cumischiuns permanentas. Per part sun commembras e commembers tschernieus da la populaziun. Otras persunas sun clamedas dal cussagl cumünel. Que as tratta da seguaintas cumischiuns: stab da guida, cumischiun sindicatoria, cumischiun da fabrica, cumischiun da planisaziun, cussagl da scoula, cumischiun da lavinas, suprastanza Engiadina Plaiv Turissem, cumischiun alps e pasculs, cumischiun da Chalandamarz. Suot www.zuoz.ch as chatta tuot las cumischiuns e las persunas in carica. Eir las gruppas da lavur dal cussagl cumünel vegnan adaptedas. Al mumaint sun in vigur gruppas da lavur per seguaints progets: proget Plagnoula (edifizi scolastic), proget plazza da scoula, proget ingrandimaint Parkegi Centrel, proget(s) lingua e cultura, gruppa da lavur clucher San Luzi.
Alp Pignaint da ZuozL’Alp Pignaint da Zuoz, illa Val Susauna sül territori da la vschinauncha da S-chanf, ho da gnir saneda. Siand cha l’edifizi existent es situo in üna zona cotschna da prievel (ova) e dadour la zona da fabrica nun aderescha l’uffizi chantunel ad üna dumanda da fabrica per üna sanaziun. La soluziun es da fabricher üna nouv edifizi scu Alp Pignaint da Zuoz ad ün nouv lö. Que in pocha distanza dal lö actuel ma in üna zona chi permetta. Il cussagl cumünel decida dad inoltrer la dumanda da fabrica tar la vschinauncha da S-chanf.
Adressamaint –tevlinas numers da chesasZieva cha’l cussagl cumünel as vaiva decis per las nouvas tevlinas melnas per l’adressamaint a Zuoz ho que do divers tschegns our da la populaziun cha la soluziun nu cuntainta. Il cussagl cumünel as ho piglio il temp da tschercher il dialog cun exponentas ed exponents da la populaziun e decida da lascher prodür e da preschanter üna nouva varianta a possessuras e possessuors da chesas a Zuoz. Las nouvas tevlinas sun ün mielin pü pitschnas, da culur anthrazit ed in aluminium bütto. Dalum cha las tevlinas sun avaunt maun piglia la vschinauncha a maun il müdamaint da las actuelas süllas nouvas tevlinas. Tuot las possessuras e possessuors dad edifizis vegnan darcho servieus cun üna charta sur da l’agir.
Chalandamarz 2024La cumischiun da Chalandamarz ho do ün sguard critic inavous sül Chalandamarz 2023, eir sün resuns da scolaras es scolars. Sülla basa da que fo la cumischiun da Chalandamarz trais propostas a maun dal cussagl cumünel. La cumischiun da Chalandamarz propuona cha a partir dal 2024 dessan eir las mattas purter üna s-chella. Zieva dessan adüna cur cha’l cortegi chamina in lingia ir ouravaunt ün bloc da 12 mats cullas s-chellas grandas. E finelmaing as voul darcho chanter las chanzuns in duos vuschs. Il cussagl cumünel es perinclet cullas propostas e decida unanimamaing da seguir a telas.