Noviteds dal cussagl cumünel da Zuoz
In sias ultimas tschantedas ho il cussagl cumünel traunter oter tratto e decis sur dal seguaint:
Repars da lavinas Albanas – progettaziun etappa 3, surdeda lavuors
Düraunt l’an 2023 vain glivreda l’etappa 2 dal rimplazzamaint dals repars da lavinas sün Albanas. Il proget vain cuntinuo culla terza ed ultima etappa. Siand cha’l büro d’indschegner pitsch-ing ho fingià fat las planisaziuns per las prümas duos etappas, fo que sen da surder eir la progettaziun da l’etappa 3 al büro pitsch-ing. Il cussagl cumünel es unanimamaing perinclet da surder las lavuors al büro pitsch-ing.
Svilup areal Staziun – evaluaziun in connex cun spazi d’ova
Siand cha tar la plazza da Staziun passa l’Ova da Fuschina in ün tombin suot la Via Staziun e la plazza da parker, inua cha’l svilup dess avair lö, es gnida sü la tematica da la protecziun d’ova. Ad ho gieu lö üna tschanteda cul uffizi per natüra ed ambiaint per discuter la chosa. Il fat es, cha scha ovas in tombins sun pertuchedas tres üna fabrica, disch la ledscha da metter telas darcho a la surfatscha. Scha’s riva da musser sü, cha que nun es realisabel u na radschunaivel, alura as po inavaunt lascher l’ova in ün tombin. Il cussagl cumünel aderescha dad invier ün stüdi d’indschegner per approfundir la situaziun.
Management ovas Plaiv – decisiun da basa
L’ideja per ün management cumünaivel da las ovas illa Plaiv es gnida preschanteda al cussagl cumünel insembel cullas otras suprastanzas cumünelas da la Plaiv. Que’s tratta dad üna collavuraziun illa tematica provedimaint d’ova. Previs es ün büschneder chi surpiglia las lezchas per tuot las vschinaunchas da la Plaiv. Eir la redundanza, que voul dir ün sistem collio e cumpatibel chi protegia da manchaunza e perditas d’ova, es tema da la discussiun. Il cussagl cumünel es dumando per ün intent da basa da cuntinuer in merit e perseguiter üna collavuraziun. Zieva üna discussiun es il cussagl cumünel unanimamaing da l’avis da cuntinuer l’elavuraziun d’ün management ovas Plaiv. Que culla premissa cha la basa da la collavuraziun es cumplessiva e cun structuras cleras e fundedas.
Strategia regiunela passlung
Il cussagl cumünel es gnieu infurmo sur dad üna strategia regiunela per il passlung. Il cussagl cumünel es da l’avis cha culla collavuraziun illa Plaiv a reguard la gestiun da las loipas as metta fingià il „Benchmark“ per l’Engiadin’Ota. Ün’expansiun da la collavuraziun in tuot l’Engiadin’Ota pudess esser ün pass positiv per tuot la spüerta. Il cussagl cumünel es da l’avis cha tela nu po ir a cuosts da la qualited e la collavuraziun existenta illa Plaiv. La Plaiv po ir ouravaunt scu bun exaimpel per cha’l rest da l’Engiadin’Ota po fer las lezchas e ragiundscher il listess livel. Al listess mumaint as es aviert per ulteriuras idejas e discussiuns. A reguard üna organisaziun d’infrastructura regiunela es il cussagl cumünel da l’avis cha’l focus dess il prüm esser sülla preparaziun e gestiun da las loipas. Cur cha que es optimo as po eir discuorrer sur da l’infrastructura.
Sponsoring Nicola e Gian Andri Bolinger
Il cussagl cumünel decida da sustgnair a Nicola e Gian Andri finanzielmaing düraunt la stagiun 2023/24 sülla basa ch’els faun part da cumpetiziuns dal champiunedi mundiel ed europeic. Els rapreschaintan Zuoz sün medias socielas e staun eir a disposiziun per differentas activiteds in vschinauncha.
Dumanda da sustegn La Diagonela
Il cussagl cumünel tratta la dumanda da sustegn per La Diagonela, inoltreda pels ans 2025 fin 2029. Zieva cha’l sustegn finanziel da la vschinauncha d’eira oriundamaing decis pels prüms ans scu chapitel iniziel discuta il cussagl cumünel detagliedamaing la pusiziun da La Diagonela, la valur da l’evenimaint ed il dovair da la vschinauncha da sustgnair tel finanzielmaing. Finelmaing decida il cussagl cumünel unanimamaing da sustgnair La Diagonela pels ans 2025 e 2026 i’l ram scu fin uossa. I’ls prossems trais ans ho La Diagonela l’incumbenza da svilupper la cifra da partecipantas e partecipants cun ün effet süllas entredgias. Impü dess La Diagonela musser sü la creaziun da valur tres l’evenimaint a Zuoz ed illa regiun, eir a reguard ils marchos turistics relevants per la regiun.
Proposta scumpart cuosts vias champestras Zuoz/S-chanf
Il scumpart da cuosts tar sanaziuns da vias champestras sül territori da la vschinauncha da S-chanf basescha sün üna cunvegna dal 2012 inua cha’s ho defino ün scumpart da cuosts basand sün possess ed interess. La nouva proposta nu prevezza pü üngün scumpart, dimpersè ch‘üna u l’otra vschinauncha surpiglia tuot ils cuosts per traget tenor interess principel. Il grand avantag da quist sistem es cha la vschinauncha da Zuoz es liber i’l agir dals tragets chi sun importants per Zuoz. La proposta elavureda vain preschanteda a e discuteda culla vschinauncha da S-chanf.
Digitalisaziun administraziun cumünela – program d’affers administrativs
L’introducziun d’ün uschedit GEVER (Geschäftsverwaltung) es già üna buna pezza ün tema eir tar l’administraziun cumünela da Zuoz. La magiurited da las vschinaunchas in Engiadina haun fingià introdüt ün tel program chi lascha tratter tuot ils affers in möd digitel e cumplessiv. Il cussagl cumünel ho decis dad introdür dal 2024 il program „cmi“ da la ditta CM Informatik AG, chi’d es ün dals furnituors principels in Svizra.
Cunvegna da collavuraziun traunter Zuoz e S-chanf a reguard il servezzan forestel e tecnic
La collavuraziun traunter las vschinaunchas da S-chanf e Zuoz pel servezzan forestel e tecnic exista daspö l’an 2014. Dal 2021 as ho piglio a maun üna analisa e surelavuraziun da la cunvegna per optimer las structuras. Il temp da prouva da quists adaptamaints scada la fin da l’an 2023. Scha üngüna da las vschinaunchas nu fo desditta a la cunvegna, as prolungescha quella pels prossems 4 ans fin la fin da l’an 2027. La suprastanza cumünela da S-chanf ho intaunt signaliso da vulair adapter la collavuraziun in divers puncts, voul dir da minimer las lezchas dal servezzan tecnic süllas lavuors pel provedimaint d’ova. Il cussagl cumünel da Zuoz es pront dad accepter quist müdamaint sülla basa dad üna desditta da la cunvegna existenta. I’l cas dad üna desditta da la vart da la vschinauncha da S-chanf es il cussagl cumünel da Zuoz pront da discuter da cuntinuer las lavuors per ün temp transitoric fin cha la vschinauncha da S-chanf ho fabricho sü las resursas per ün egen servezzan tecnic e elavuro üna proposta per üna nouva cunvegna a reguard il servezzan in avegnir. Las prestaziuns dal servezzan forestel, cha la vschinauncha da S-chanf prasta per la vschinauncha da Zuoz, scrivess la vschinauncha da Zuoz our nouv.