Quist di d’aventüra per muos-chers ed oters interessats ha lö in dumengia, ils 8 avuost, darcheu a Panas-ch. Da las 09.45 fin las 13.45 vegnan sports differents cuors respectivamaing blocs d’infuormaziun, per exaimpel vegna muossà a liar muos-chas ed i vain preschantà il material e la fisica da pes-char culla muos-cha. Implü as imprenda la fundamainta per laschar svolar la muos-cha ed ils interessats pon far las prümas experienzas directamaing pro l’aua. A Panas-ch pro Ramosch exista nempe il prüm traget «Fly only» in Grischun. Il böt da quist di d’aventüra es nempe da motivar da pes-char culla muos-cha e da chattar nouvs commembers per la società. «Ils interessats survegnan invista in quista metoda da pes-char fascinanta ed els pon imprender ed accumpagnar ils profis», quinta Cla Mosca, organisatur dal di d’aventüra e president da la Società muos-chers Engiadina Bassa. Tour part a las activitats pon creschüts ed uffants a partir da nouv ons. «Nus racumandain simplamaing da trar aint stivals o s-charpas impermeablas, il material vain eir miss a disposiziun», declera il president da la società. Las activitats nu cuostan nüglia, da las 12.30 fin las 13.00 es organisà ün giantar cumünaivel. 

Il di d’aventüra per muos-chers es per Cla Mosca ün’ulteriura actività i’l svilup da quist sport attractiv e persistent. Uschè venda eir la destinaziun turistica la fascinaziun dal pes-char culla muos-cha sco attracziun turistica per glieud interessada. Cumplettada vain la sporta dafatta cun instructers da pes-char e cun perchas da qualità engiadinaisa. Per exaimpel l’hotelier e muos-cher paschiunà Renato Vitalini da Scuol venda sias perchas sün tout il muond e fa uschè eir reclama per l’Engiadina Bassa sco regiun attractiva per pes-char culla muos-cha. Eir sias perchas vegnan preschantadas in dumengia, al di da muos-chers a Panas-ch.

Text: Nicolo Bass