Di d’aventüra culs chatschaders

In differentas gruppas da lavur vain muossà che cha’ls chatschaders fan dürant tuot on per la flora e fauna. Uschè sun organisadas observaziuns da sulvaschina, da god e biodiversità ed ün parcuors per famiglias ed uffants. Il di d’aventüra dals chatschaders a reguard god e sulvaschina ha lö in sonda, ils 14 avuost, a S-charl. Quels chi s’interessan per observaziuns da sulvaschina ston star sü bod: Fingià a las 05.00 a bunura as chattan ils interessats insembel cun chatschaders versats e guardgiasulvaschinas pro la plazza da parcar a S-charl cul böt d’observar tschiervis, chamuotschs, muntanellas ed oters abitants dal god. Ils chatschaders chi accumpognan la gruppa, dan lura spiegaziuns a reguard il möd ed ils lös da viver da la sulvaschina. La spassegiada düra circa duos fin trais uras e maina fin sül Muot Tavrü. Cun tuornar daja üna pitschna marenda cun ün referat dal guardgiasulvaschina sün l’Alp Tavrü. 

La seguonda gruppa cul tema «god e biodiversità» as chatta a las 08.15 pro la plazza da cumün da S-charl. Ils annunzchats accumpognan als chatschaders dürant la lavur da custodi a favur da god, sulvaschina e biodiversità. Silviculturs e perits decleran perche cha quista lavur es fich importanta ed els orienteschan a reguard ils s-chazzis da flora e fauna. Tuot ils partecipants güdan a tgnair liber spazis da pavel per la sulvaschina, a mantgnair urs da god e preparan lös da refügi per reptils, insects ed otras bes-chas pitschnas. 

La terza gruppa vain organisada per famiglias ed uffants: Sün differents posts as imprenda a cugnuoscher il misteri da god e sulvaschina cun activitats da cumpagnia, cun zambriar, palpar, savurar e disegnar. Ils organisatuors impromettan ün’aventüra inschman-chabla per grond e pitschen. A la fin po minch’uffant tour cun sai ün’algordanza da quist di d’aventüra. La terza gruppa s’inscuntra a las 08.15 davant il museum Schmelzra S-charl. 

A partir da las 11.30 s’incuntran tuot las gruppas pro la Schmelzra S-charl, ingio cha’ls chatschaders han organisà ün’ustaria cun damangiar e da baiver per tuot la cumpagnia. La società da chatschaders Lischana offra a mincha partecipant da las differentas gruppas üna boccada ed üna bavronda. Annunzchar per quist’aventüra as poja fin mardi, ils 10 avuost.

Text: Nicolo Bass